Xanana Solidariza Militante Ne’ebe Hetan Tuda Hafoin Fila Husi Kampaña

Smnewstl.com– VIQUEQUE- 22 Abríl 2023- Prezidente Partidu Congresso Nasional Recontrução de Timor-Leste (CNRT), Kay Rala Xanana Gusmão hato’o solidaridade ba, Igidio da Silva Ximenes ne’ebé hetan tuda hosi ema deskoñesidus, hafoin remata partisipa kompaña Partidu CNRT iha kampu futeból Beloi, Munisípiu Viqueque, Sesta (21/04/2023) kalan.

Igidio sai vitima, hafoin hamutuk ho nia kolega na’in-hitu sa’e karreta hosi Viqueque atu fila ba sira nia fatin Ossu, oras tuku 18:40, derepente iha dalan, haree militante partidu balun uza atributu kesi metin iha kakorok kaer hela fatuk iha foho leten lansa tuha hasoru sira iha dalan.

Akontesimentu ne’e rezulta vitima nia ulun hetan kanek suku pontu tolu no suspeitu halai lakon no vitima nia kolega lori kedas ba hala’o tratamentu saúde iha Klinika Ossu.

“Ami fila mai too Postu Administrativu Ossu no too iha área Loihunu kuaze tuku 19:00 liu no iha karreta laran ema hamutuk ema na’in hitu, no ema tuda kona ha’u nia ulun, ha’u haree ema ne’ebé tuda uza atributu partidu FRETELIN halai sa’e kedas ba foho lolon,” dehan Igidio hafoin hasoru Xanana iha Ossu.

Hafoin akontesimentu, vitima ho kolega sira aprezenta kedas keixa ba parte PNTL Ossu nian hodi relata ba Komandu PNTL Munisipiu Viqueque.

Iha fatin hanesan, Prezidente Partidu CNRT, Xanana Gusmão sente triste ho akontesimentu ne’e no apela ba militante CNRT iha Viqueuqe no munisipiu hotu mantein paz no dame hodi kontribui ba estabilidade iha Timor-Leste hodi fó susesu ba kampaña too votasaun la’o ho susesu.

“Ha’u husu imi mantein paz, lalika provoka situasaun, ita hakmate nafatin hodi kontribui dame ba ita nia eleisaun bele la’o ho di’ak,” dehan Xanana.

Entretantu Komandu PNTL Viqueque regista mós kazu tuda tuda ne’e akontese mós iha área Makadiki nian no parte PNTL konsege hakalma situasaun.

Iha parte seluk, Koordenadór Partidu CNRT Munisípiu Viqueque, Anacleto Freitas mós apela ba militante hotu- hotu tuur hakmatek no labele kria problema.

“Maski ami nia militante ida kanek maibé ba to’o ospitál konsege hetan ona tratamentu hosi médiku sira. Akontesimentu ne’ebé iha, ita sei perdua no husu bá militante sira atu kontinua kria pas,” dehan Anacleto.

Entretantu, Komandante PNTL Munisípiu Viqueque, Superintendente Xefe Sebastião Alves Quintão kontinua koordena ho Komandu F-FDTL garante nafatin situasaun seguransa bele la’o hakmatek durante periodu kompaña too eleisaun loron 21 Maiu 2023.(Smnews)