Xanana Gusmão Sente Lakon Amigo no Belun Diak Eis Prezidente Jorge Sampaio

Smnewstl.com 12-09-2021 (Dili) – Eis Komandante Eim-Xefe Das Falintil, Kay Rala Xanana Gusmão lori nia naran no povu Timor-Leste hato’o sentidu kondolénsia profunda bá família enlutada no povu Portugéza, ne’ebe lakon ona eis Prezidente Repúblika Portugál, Jorge Sampaio.

Liu husi karta ne’ebé Líder Nasionál, Kay Rala Xanana Gusmão hakerek no haruka liu husi Koordenadór Sekretariadu Apoiu Maun-Boot Xanana, Tomas do Rosário Cabral, hodi entrega diretemente bá Embaixadór Portugal iha Timor-Leste, José Pedro Machado Vieira.

Xanana Gusmão expresa sentimentu triste tanba lakon ona amigu no belun boot di’ak ida ne’ebé hamrik hodi fó apoiu bá luta ukun rasik-aan Timor-Leste nian.

Koordenadór Sekretariadu Apoiu Maun-Boot Xanana, Tomas do Rosário Cabral ne’ebé entrega dokumentu refere haktuir, hafoin akompaña notísia tristeza ne’e, Kay Rala Xanana Gusmão rasik mak hakerek kedas karta hodi hato’o sentidu kondolénsia kle’an bá belun di’ak ne’ebé uluk hamrik hodi fó apoiu tomak bá kauza Timor-Leste nian.

“Horseik iha notísia Maun-Boot akompaña Prezidente Jorge Sampaio nia mate iha Portugal, Maun-Boot prepara kedas karta ida husi nia aan rasik hanesan amigo boot bá Prezidente Jorge Sampaio ne’ebé fó oportunidade bá Timor-Leste liu-liu kuandu ita iha hela okupasaun Indonézia,” informa Koordenadór Apoiu Maun-Boot Xanana, Tomas Cabral iha embaixada Portugal Akait, Dili. Domingu ohin.

“Maun-Boot nia sentidu kondolénsias bá amigus, famílias iha Portugal bá povu Portugal ho Timor-Leste, ne’ebé mak ohin Sekretariadu bá apoiu Maun-Boot ami mai aprezenta Maun-Boot nia karta ida atu hato’o bá Portugal,” hatutan Tomas.

Hafoin Timor-Leste ukun-aan, iha tinan 2002, eis Prezidente Repúblika, Jorge Sampaio halo kedas vizita estadu mai Timor-Leste iha tinan 2006, tanba Jorge Sampaio iha relasaun emosionál di’ak tebes ho povu Timor-Leste.

“Entaun Maun-Boot haruka hakerek karta ida haruka mai entrega iha embaixada atu haruka liu bá, entrega mós iha embaixadór no Maun-Boot hato’o hela nia sentidu kondolénsia profunda bá ita-nia belun di’ak ida, liu-liu ita-nia problemátika Timor, Prezidente Jorge Sampaio sei hamrik depois nia mai kedas vizita Timor iha relasaun di’ak ten-tebes ho povu Timor-Leste,” dehan Tomas.

Entretantu, eis Prezidente Repúblika Portugal, Jorge Sampaio hakotu i’is iha loron 10 fulan Setembru tinan 2021, iha Ospitál Santa Cruz Lisboa Portugal, ho idade tinan 81, tanba sofre moras respiratóriu.(ant)