Xanana Gusmao Iha Oecusse, Asiste Julgamentu ba Eis Padre Dasbach

Smnewstl.com Media Online -Kazu Topu Honis ne’ebe involve eis Padre Dasbach kontinua hetan atensaun husi Lider Nacional, Kay Rala Xanana Gusmao.

Iha loron 21 Julho 2021, hafoin kompleta Vasina ba dala rua, Kinta-feira, 22-07-2021, akompanha husi nia Siguransa Pesoal desloka kedas ba Oecusse.

Xanana Gusmao ne’e to’o iha Porto tuku 5 (lima) dadersan direitamente desloka kedas ba Hotel, hafoin iha fali tuku walu liu minutu hat nulu resin lima kontinua ba Tribunal Distrital Oecusse.

Julgamentu ne’ebe halao tuku sia liu minutu tolu nulu ne’e taka ba publiku no Kay Rala Xanana Gusmao mos la autoriza atu akompanha, maske marka prezensa iha Tribunal.

Xanana Gusmao mos kumpri ba regras tamba desde inisiu prosesu taka ba nune’e hafoin iha minutu balun hetan esplikasaun deside hodi fila fali deit.

Tuir informasaun julgamentu ba kazu ne’e tama ona ba rona deklasaun husi vitima, ne’ebe mos partisipa husi eis Padre Dasbach.

Eis Padre Dasbach diskumfia halo abuzu sexual ba vitima minoridade sira iha Orfonato Topu Honis, ne’ebe nia rasik maka lidera.

Ba kazu ne’e rasik parte Vaticano, foti ona desizaun hodi demite nia husi Padre maske prosesu judisial sei lao hela.

Enkuanto Prezensa Kay Rala Xanana Gusmao hanesan reafirma ona antes katak, hakarak akompanha prosesu ne’e no husu atu hatur justisa ho lolos.

Julgamentu ba kazu ne’e lidera husi Juiz Kolektivo Yudit Pamukas, Hugo da Crus Pui no Evangelino Belo. Ministerio Publiku reprezenta husi Matias Soares.

Eis Padre Dasbach hetan asistensia legal husi advogado Eusebio Guterres, Miguel Faria, Pedro Aparico inklui advogado rua seluk tan. (Rio)