Xanana Gusmao Deklara ba Publiku Seidauk Deside Apoio Kandidatu Ruma ba Presidente Republika

Smnews.tl, 16-09-2021 (Dili) – Presidente Partido Congreso Nacional Rezistensia Timorense (CNRT) liderado Kay Rala Xanana Gusmao deklara ba publiku katak, durante seidauk hola pozisaun ruma atu apoio kandidatu ruma ba Presidente Republika periodo 2022-2027.

Desde kedas eleisaun presidensial 2007 mai to’o 2017, provas hatudo ona katak, kandidatu ne’ebe hetan bensaun husi Kay Rala Xanana Gusmao ba tu’ur iha Aitarak Laran mak hanesan Eis Presidente Republika, Jose Ramos Horta, General Taur Matan Ruak atual Primeiro Ministro oitavo governo konstitusional inklui Presidente atual Francisco GuterresLu-Olo.

Liu husi konferensia imprensa iha Sede CNRT Bairos dos Gerilos Dili, Sexta-feira ne’e, Vice Presidente Partido CNRT, Virgilio Smith dehan, Iha loron 16, fulan setembro, tinan 2021, Membros husi Komisaun Politika Nasional
Partido CNRT, halibur malu iha Sede Partido, iha Bairro dos Grilos, Dili, deside ona Ho baze iha ninia Estatutos, Partido CNRT sei deside, iha tempo ne’ebé
oportuno kona-ba kandidato Partido-nian, ne’ebé sei konkorre ba Eleisoens
Prezidensiais ba período 2022-2027.

Tanba ne’e duni no haré ba situasaun politika atual, membros husi Konferensia Nasional Partido CNRT sei reune, iha oportunidade nebé lós, ho hanoin atu deside kona-ba kandidato nebe Partido sei apoia iha Eleisoens Prezidensiais nebé sei mai.

Kona-ba informasaun nebé la’o hela iha públiku nia let, katak Maun Bot Kay Rala Xanana Gusmão ka Partido CNRT rasik, apoia daudauk ona ka sei apoia kandidatus balun, Komissaun Politika Nasional, husi Partido CNRT deklara, iha ne’e, katak buat né hotu la lós no mesak lian falsu.

Virgilio Smith hatutan, nudar Partido politiku ida, CNRT defende katak tenki tuir didiak regras nebé prevê ona iha ninia Estatutos, tan ne’e hakarak informar ba públiku em jeral no ba militantes Partido-nian, em partikular, katak Partido, liu husi ninia órgauns máximus, nebe hatúr ona iha ninia Estatutos, sei hasai desizaun ruma, iha tempo nebé oportuno, kona-ba kandidatu ida nebé maka Partido sei fó ninia apoio politiku tomak, he missaun atu salvaguarda Estado de Direito Demokratiku, tuir sá-ida mak hakerek ona iha Konstituisaun RDTL-nian.

Ikus liu, Komisaun Politika Nasional hakarak fő hatene ba publiku katak Partidu CNRT seidauk no sei la orienta kualker partidu ida atu lori fali Prezidente Partidu CNRT nia naran hodi fo apoiu ba partidus sira né.(ant)