Xanana Deklara Sei Revoga Lei Ne’ebé Governu Anteriór Aprova

Smnewsl.com – Primeiru-Ministru, Kay Rala Xanana Gusmão hateten, governu konstitusional da-sia, sei halo revogasaun ba lei hotu ne’ebé governasaun anterior aprova.

Tuir Xanana, alterasaun ba enkuadramentu legal hirak ne’e ho objetivu, atu hatur fila-fali sistema finanseira ne’ebé kria husi Eis Minsitra Finansas, Emília Pires iha kuartu governu no kintu governu konstitusional.

Xefe Governu ne’e konsidera, sistema ne’ebé Eis Ministra Finansas instala ne’e di’ak tebes, tanba hetan apresiasaun husi comunidade internasional, no mós konsege hatama osan reseitas ba estadu liu husi fundu petrolíferu ho montante billiaun $ 8.

“Alterasaun ne’e ho objetivu atu bele tuir fali sistema ida uluk ne’ebé eis Ministra Finansas Emilia Pires installa sistema finansas ne’ebé komunidade internasionál hotu-hotu apresia tebe-tebes,” hatete Xefe Governu, Xanana Gusmão, hafoin remata enkontru semanal ho Prezidente Repúblika, José Ramos-Horta, iha Palásiu Prezidensiál. Kinta-feira (27/07/2023).

Xanana Gusmão hatutan, estadu Timor-Leste sei deve hela eis Ministra Finansas, Emília Pires, tanba sistema finanseira hirak ne’e, governante ne’e mak instala.

“Hanesan ha’u temi mós povu tomak debe ba mana Emilia Pires tanba hodi nia matenek mós ajuda ita investe fundu petroleum ne’ebé agora ita investe ba hatama tan billaun $ 8,” dehan Xanana.

Alende ne’e, Xefe Governu ne’e hatutan, IX Governu konstitusional sei aselera atu apresenta proposta Orsamentu Retifikativu ba Parlamentu Nasional iha loron 10 fulan Augustu 2023, nune’e bele hetan aprovasaun hodi haruka ba Xefe Estadu atu promulga.

Nune’e, bainhira Orsamentu Retifikativu aprova, maka governu mós sei halo halo alterasaun ba leis estruturante sira hanesan, lei kona-ba fó indultu ba prizioneirus sira, lei kompeténsia Xefe Estadu nian no leis sira seluk tan, tanba ne’e tama mós iha programa prioridade governu nian ne’ebé sei implementa iha durante loron 120. (Smnews)