Xanana : ‘Dada Bebeik’, Ema Seluk Aproveita Hotu Ita Nia Riku Soin

Smnewstl 04-11-2021 (Ainaro) – Líder Másimu Partidu Kongressu Nasionál Rekonstrusaun Timor (CNRT), Kay Rala Xanana Gusmão, hahú konsolida maka’as nune’e hetan ka’er hodi asume hikas responsabilidade bá normalizasaun situasaun polítika atual inklui halo balansu bá dezenvolvimentu rai laran.

Eis líder rezisténsia dehan, bainhira partidu ne’ebé nia lidera la ka’er metin valores maka ohin loron Ministru sira husi CNRT mós la husik hela governu.

“CNRT la ka’er metin valores maka ohin loron Ministru sira mós la husik hela governu. Sai bo’ot atu servi, la’ós atu bá buka Ministru, rona preokupasaun nune’e hamutuk hadi’a rai ne’e, maibé haree katak, governu laiha kbiit bá halo ida ne’e, entaun sai,” tenik Xanana Gusmão, kuarta-feira, 03-11-2021, iha intervensaun simu voluntariamente sidadaun sira husi Postu Administrativo Maubisse, Munisípiu Ainaro ne’ebé deklara a’an apoiu hasoru festa demokrasia elisaun prezidensiál 2022 no parlamentar 2023.

Bá Maubisse anan, Xanana husu atu hirak inklui hodi fó CNRT iha eleisaun prezidensiál no parlamentar atu muda moto husi Ka’er A’an Lao bá Oin bá fali Far A’an Labele Dukur katak, ho servisu maka’as de’it mak bele garante susesu.

“Ami tenki rekoñese, 2007 hetan kadeira 18, 2012 kadeira 30, ne’ebé hanoin katak sa’e hela de’it hodi la atensaun másimu bá báze. Agora imi mai fó apoiu, hau simu ho liman rua, imi nia apoiu. Mai bá, ita hamutuk hodi hadi’a ita nia rai,” tenik Xanana.

Xanana fundamenta, Timor Leste konkista nia independénsia lori ruin ho ran, tanba ne’e lakoi atu kontinua husik nasaun ho moris iha situasaun inserteza nia laran.

“Ohin imi mai fó apoiu tan, hau simu, simu ho liman rua. Mai bá, ita hamutuk, ita labele husik hela de’it, ita la bokan no husik hela de’it, ema seluk maka sei aproveita mós ita nia riku soin,” apela Xanana.

Konselleiru Movimentu Apoiu Xanana, Alexandrino Araújo Xavier iha nia intervensaun afirma, ejistensia movimentu ho objetivo ida de’it atu lori fila Kay Rala Xanana Gusmão bá asume responsabilidade hodi hadi’a rai ne’e.

Eis Sekretáriu Estadu Protesaun Sivil ne’e husu bá inan aman sira atu labele hili sala iha eleisaun Prezidensiál 2022 no Parlamentar 2023 tanba garante ho Kay Rala Xanana Gusmão de’it mak iha vizaun ne’ebé furak bá hadi’a rai ne’e.

Antes ne’e iha Suku Cribás, Postu Administrativo Manatuto Vila mós Xanana Gusmão reafirma ona katak, preparado bá hasoru festa demokrasia li-liu eleisaun Prezidensiál iha Marco 2022.

Xanana esplika, remata tiha eleisaun Prezidensiál hafoin koalia fali eleisaun parlamentar.

Enkuantu to’o oras ne’e, Prezidente Repúblika rasik seidauk pronunsia data bá eleisaun Prezidensiál no tuir deklarasaun sei publika iha fulan Janeiru tinan 2022.(rio)