Vasina Pfizer Doze 100.620 Sei To’o TL, Prioridade Bá Labarik ho Idade 12-17

Smnewstl.com 22-09-2021 (Dili) – Iha reuniaun konsellu ministru kuarta-feira ohin, responsável sira husi elaborasaun no koordenasaun ezekusaun planu vasinasaun kontra Covid-19 iha Timor-Leste, aprezenta ona preparasaun kona-ba implementasaun vasina Pfier iha territóriu nasionál.

Vasina Pfizer ne’e, tuir planu sei implementa bá foin-sa’e sira ho idade husi tinan 12 to’o tinan 17 kontra virus Covid-19 iha Timor-Leste.

“Mekanizmu COVAX konfirma ona disponibilidade hodi haruka doze 100.620, ne’ebé sei to’o iha país iha tempu badak laran. Tuir planu ne’ebé aprezenta vasinasaun ne’e sei realiza iha eskola sira no alunu foin-sa’e rihun 50 sira husi 6 0 to’o 110 liseu, husi munisípiu pre-selesionadu sira, maka sei simu vasina ba dahuluk,” haktuir iha komunikadu imprensa ne’ebé Smnewstl.com asesu, kuarta ohin.

Iha faze daruak nian sei vasina alunu sira seluk no ba foin-sa’e sira ne’ebé la rejista iha eskola sira. Doze daruak husi vasina ne’e nian sei administra ho intervalu loron 21.

Entretantu, aimoruk vasinasaun Pfizer refere konserva iha Servisu Apoiu Medikamentu Ekipamentu Saúde (SAMES), tanba halo ona preparasaun ba kondisaun nesesária armazenamentu vasina nian sei realiza SAMES ho apoiu tékniku no finanseiru UNICEF nian.

Prepara ona prosedimentu operasionál sira, ba armazenamentu, transporte, jestaun no aplikasaun vasina nian, ne’ebé sei asegura ho apoiu tékniku husi Organizasaun Mundiál Saúde nian.

Vasina Pfizer kontra COVID-19 ne’e iha efikásia 95% kontra infesaun sintomátika SARS-CoV-2 nian.(ant)