TLPU Aprezenta Rezolusaun Revé Dekretu-lei Subsídiu Front Line Bá Jornalista

Smnewstl.com 13-11-2021 (Dili) – Asosiasaun jornalista Timor-Leste Press Union (TLPU) liu husi kongressu extra-ordináriu, aprova rezolusaun ida hodi hato’o bá governu liu husi Ministériu Assuntu Parlamentar no Komunikasaun Sosiál (MAPKOMS) atu halo revizaun bá dekretu-lei kona-ba suplementu remuneratóriu ne’ebé atribui bá jornalista.

Rezolusaun ne’e, kongresista sira entrega bá estrutura foun, lideradu Prezidente Candido Alves no entrega direta ona bá Ministru Assuntu Parlamentar no Komunikasaun Sosiál (MAPKOMS), Francisco Jerónimo bainhira taka kongressu extra-ordináriu TLPU nian iha salaun Delta Nova, Sábdu ne’e.

“Na’i Ministru fukun ida-ne’ebé ami hasoru ohin ami tetu iha ne’e, ha’u foin mak simu iha minutu hira liu bá, maibé surat seidauk to’o na’i Ministru, maibé ha’u hato’o kedas ona bá katak, fukun ida kona-ba front line, liafuan ida-ne’ebé katak, jornalista non skills,” dehan Prezidente TLPU, Candido Alves, iha diskursu, hafoin eleitu.

Candido Alves sente kontente, bainhira rona Ministru MAPKOMS, Francisco Jerónimo katak, hadomi jornalista sira ho fuan, maibé, realidade hadomi ho dólar $ 5.

Hatán bá preukupasaun ne’e, Ministru MAPKOMS, Francisco Jerónimo, desmente ho informasaun ne’ebé espalla katak, atribuisaun subsídiu dólar $ 5 bá jornalista ne’e konsideradu jornalista sira non skills.

Tan ne’e, MAPKOMS, promete, sei buka tuir informasaun ne’e, tanba dalaruma iha ema balun mak lansa informasaun falsu hodi.

“Relasiona ho Señór Prezidente ita-boot ohin foti kestaun kona-ba ne’e, ha’u hanoin lei ne’e ha’u aprezenta iha konsellu ministru ha’u la ko’alia kona-ba un skills, maibé ha’u ko’alia kona-ba subsídiu bá jornalista sira ne’ebé mak halo nia knár iha front line, ho artigu la’ós barak,” afirma Ministru MAPKOMS, Francisco Jerónimo.

MAPKOMS esplika, bainhira la kria dekretu-lei espesífiku ida, maka labele atribui subsídiu liña frente bá jornalista sira, tanba jornalista sira la’ós funsionáriu públiku.

“Ida-ne’e mak ami halo, maibé dala ida tan, ha’u sei bá buka tuir, sé mak tau sasán sira hanesan ne’e ha’u sei buka tuir atu hatene, tanba buat ne’ebé mak ha’u aprezenta iha konsellu ministru la hatete un skills la’e, ha’u ko’alia jornalista,” tenik MAPKOMS.

Entretantu, MAPKOMS subliña, atribuisaun suplementu remuneratóriu ba profisionál sira ne’ebé dezenvolve atividade jornalístika, ne’ebé Governu husu hodi fornese informasaun kona-ba mitigasaun COVID-19 durante fulan sia (abríl to’o dezembru), tinan 2021 no kada loron $5.

Foin lalais, liuhosi reuniaun Konsellu Ministru, aprova Projetu Dekretu-Lei ba kriasaun subsídiu ba profisionál sira ne’ebé dezenvolve atividade jornalístika, ne’ebé Governu husu hodi fornese informasaun kona-ba mitigasaun COVID-19.

Nune’e, dekretu-lei ne’e profisionál sira ne’e hala’o ona sira-nia funsaun ho forma ezemplár hodi kontribui ativamente ba divulgasaun informasaun ne’ebé kredível no nesesária kona-ba prevensaun no kombate pandemia iha territóriu nasionál.(ant)