TL Rezista Ona Pasiente Variante Delta Na’in-4

Smnewstl.com Media online — Ministra Saúde, Odete Maria Freitas Belo anunsia bá públiku katak, Timor-Leste hahú rejista ona pasiente ho kazu variante Covid-19 Delta na’in-4 iha Timor-Leste.

Ministra Saúde haktuir, pasiente variante Delta na’in-4 ne’e deteta, bainhira laboratóriu nasionál saúde haruka bá amostra 300 bá laboratóriu Austrália hodi halo análize.

“Ohin hakarak atu subliña liután hodi informa bá públiku katak, rezultadu sekuénsiasaun jenómika husi amostra 300 ne’ebé laboratóriu nasionál saúde haruka iha dia 14 de Jullu 2021 bá iha laboratóriu Melbourne Austrália ho pedidu atu halo teste urjente bá amostra balun, ikus hatudu katak, amostra husi ema na’in-4 ne’ebé tama husi Indonézia sidadaun timoroan na’in-3, estrajeiru na’in-1 iha dia 25 de Juñu ho dia 8 de Jullu iha nia númeru liñeajen B.1617.2, liñeajen ida-ne’e indika bá variante ne’ebé ita bolu Delta,” dehan Ministra Saúde, Odete Belo, iha komferénsia imprensa sesta (23/07/21) Sentru Konvensaun Dili (CCD).

Ministra Saúde hatutan, pasiente infetadu bá variante foun Delta na’in-4 ne’e, agora iha hotu izolamentu, no ida mak rekopera ona.

Husi pasiente na’in-4 ne’e, na’in-3 sidadaun timoroan, no ida sidadaun estrajeiru.

“Sira na’in-4 ne’e iha hotu kuarentena, ita konsege halo kuarentena no izola sira, iha señór ida mai husi Indonézia mak negativu ona i fila ona bá uma, na’in-3 mak sei iha fatin izolamentu, na’in-2 asintomátiku na’in-1 iha Vera kruz ho sintomas,” subliña nia.

Odete Belo afirma, variante foun Delta, oras ne’e sai preukupasaun boot iha mundu, inklui mós Timor-Leste.

Tanba ne’e nia husu bá komunidade sira nafatin kuidadu aan, maske variante Delta ne’e transmisível, maibé tenki kumpre nafatin regras prevensaun sira fase liman, uza máskara no distánsia sosiál.(ant)