Timoroan 7 Tenta Ultrapasa Ilegal ba Indonesia Sae Sabuk

SMNewstl.com (Dili)-Tuir informasaun ne’ebe SMNews asesu liu husi pagina ofisial Servisu Relasaun Publiku PNTL konfirma katak, Komandu Polísia Nasionál Timor-Leste liuhusi Unidade Patrullamentu Fronteira (UPF) kaptura ona sidadaun timoroan na’in-5 ne’ebé hakat fronteira terestre ho ilegál hodi tama ba Indonézia.

Komandante UPF, Superintendente Euclides Belo, deklara sidadaun hirak ne’e UPF kaptura liuhusi operasaun Postu Alfa ne’ebé destaka iha fronteira terrestre Timor-Leste ho Indonézia.

“Ohin dader ita nia membru sira hosi UPF Companhia Alfa postu Tunubibi kaer joven nain 2 ho ojek no foin daudaun kaptura tan joven nain 5 inklui ema ida fasilita hodi tama iha area ponte Nunura ne’ebe tenta ultrapasa fronteira ilegalmente ba Indonezia hodi sae sabuk”, relata Euclides Belo iha Kuartel UPF, Nu Badak, kinta ne’e.

Nia dehan, hosi ema nain 7 ne’e nain rua entrega ona ba eskuadra PNTL Atabae no nain 5 seluk entrega ona ba eskuadra PNTL Batugade hafoin halo hela identifikasaun hotu sei entrega ba ekipa saúde COVID-19 hodi halo teste ba sira nia saúde no sei submete ba kuarentena hodi evita propagasaun.

“Loron rua liu ba ami hamutuk ho Vise-Ministru Interior mós kontinua sosializa informasaun ba populasaun iha liña fronteira hodi informa karik hetan ema oin foun ruma iha sira nia let no evita halo kontaktu ho komunidade sira husi Indonézia”, nia dehan.

Nia afirma, asaun kapturasaun ne’e mós nu’udar parte ida hodi evita tranzmisaun peste letál Coronavirus ka COVID-19 tanba nasaun viziñu hanesan Indonézia kontínua eziste propagasaun surtu COVID-19.

Euclides hateten, kona-ba asuntu fronteira ne’e presiza sidadaun hotu-hotu nia kontribuisaun ba seguransa hodi apoiu PNTL no FALINTIL-Forsa Defeza Timor-Leste (F-FDTL).

“Atu prevene kalamidade surtu COVID-19 iha Timor-Leste, ami simu orientasaun husi Komandu Jerál PNTL hodi garante seguransa ba implementasaun Estadu emerjénsia (EE) iha liña fronteira liu-liu iha iha Maliana, Suai to’o Oe-Cusse, entaun ami nafatin esforsu hodi asegura fronteira no sidadaun ne’ebé tama ho dalan ilegál sei kaptura hodi prosesa tuir lei”, tenik komandante UPF ne’e.

Euclides nafatin apela ba sidadaun hotu-hotu ne’ebé hela iha fronteira atu halo kooperasaun diak ho PNTL karik iha ema foun balu halo movimentu informa lalais ba parte seguransa.(**)