SMnewstl.com DILI | 15 Abril 2026 -Operasaun Boot Ida Husi Polísia Nasionál Timor-Leste (PNTL) Liuhusi Diresaun Servisu Investigasaun Kriminál (DSIK) Konsege Desmantela Rede Suspeitu Hatama Osan Falsu Ho Montante Millaun Haat Resin Iha Área Bidau Santana, Díli.
Medida polisial ne’e bazeia ba delegasaun kompeténsia husi ministériu públiku (MP) ba PNTL, liuhusi DSIK, hodi dezmantela armazen loja xineza Y & W iha Aldeia Sagrada Família, Suku Bidau Santana, Postu-Administrativu Kristu-Rei, Munisípiu Díli, iha loron kuarta-feira (15/04/2026), tuku 10:30 otl Dader.
Ho Mandadu Orgaun Judisiáriu, NUK: 0138/26-PNSIC, ekipa investigasaun tama no halo revista iha armagen refere, ne’ebé rezulta deteta no apreende osan falsu ho kuantidade boot.
Durante operasaun, autoridade sira deskobre brankas lima ne’ebé mamuk no kaixa boot haat ne’ebé rai pakote osan falsu hamutuk 158 no kada pakote ho nota osan ho valor nominal dolar atus ida hamutuk futun tolu, ho estimativa valor us$30.000 kada pakote, hodi halo totál osan falsu kuaze millaun haat resin.
Polísia mós asegura sidadaun Xineza na’in-tolu no sidadaun Indonézia ida ne’ebé hanesan traballadór loja refere, no lori hotu ba iha Edifísiu DSIK, Kuartel Jerál PNTL Iha Caicoli, atu halo prosesu investigasaun tuir lei.
Iha tempu ne’ebé evidénsia to’o iha DSIK, Komandante Jerál Pntl, Afonso Dos Santos, hamutuk ho Segundu Komandante Jerál, Natércia Eufrázia Soares Martins, tun direitamente atu haree no verifika apreensaun ne’e. (/SMnews)
Komentariu