Taxa Vasina Iha Munisípiu Tolu Ki’ik, PN Husu Governu Intensifika Kampaña Vasinasaun

Smnewstl.com 28-09-2021 (Dili) – Tuir dadus ne’ebé relata husi Sala Situasaun Sentru Integradu Jestaun Krize (SIJK) relata katak, prosesu vasinasaun iha Timor-Leste, k’ik liu mak munisípiu tolu hanesan Aileru, Ainaro no Ermera.

Koordenadór Pilár 7 Covid-19, Doutór Nilton do Carmo da Silva hateten, taxa vasinasaun to’o horseik (segunda-27-09-21) iha mudansa makas, kompara ho fulan kotuk liu bá.

Maibé, ida-ne’e de’it seidauk másimu, tanba ne’e, Doutór Nilton mós husu apoiu huis deputadu sira-nian, atu ajuda governu ho SIJK halo kampaña vasina bá populasaun sira, tanba sei iha munisípiu tolu hanesan, Ainaru, Ermera no Aileru mak númeru vasina sei ki’ik.

“Servisu makas ne’ebé mak presiza mós tulun husi na’i deputadu sira liu-liu bá munisípiu sira-ne’ebé mak ki’ik-oan, Ermera, Ainaro no mós Aileu atu bele ita hasa’e kobertura vasina bá ita-nia maluk sira, tanba husi SIJK, ministériu saúde no mós pilares sira ami-nia rekomendasaun rua de’it. Ida mak hasa’e kobertura vasina, tanba ita-nia vasina seidauk makas,” dehan, Doutór Nilton do Carmo da Silva, hafoin halo aprezentasaun iha PN, bainhira debate pedidu renovasaun estadu emerjénsia bá dala-18. Tersa ohin.

Koordenadór pilár 7 ne’e esplika, importánsia husi vasina mak oinsá atu kontribui bá redús kazu gráve no mós evita ospitalizasaun ne’ebé presiza kuidadu intensive.

Reprezentante sira iha uma fukun Parlamentu Nasionál (PN), husu governu atu intensifika tan kampaña vasinasaun, nune’e bele konsiensializa sidadaun sira hodi hakat bá sentru saúde atu simu vasina.

“Maksimiza vasinasaun iha territóriu tomak hodi ita bele fila hikas bá normalidade, no mós husu governu atu intensifika sosializasaun bá moras Covid-19 no mós intensifika sosializasaun bá vasina ne’e rasik iha terrritóriu tomak,” dehan Deputada bankada Partidu Demokrátiku (PD), Elvina Sousa.

Hatán bá preukupasaun ne’e, Primeiru-Ministru, Taur Matan Ruak hateten, governu halo esforsu makas liu husi orienta membru governu sira tun bá munisípiu hodi sosializa kampaña vasinasaun kontra Covid-19 iha munisípiu sira.

“Kampaña vasinasaun, governu halo esforsu boot loos, prátikamente última semana desizaun ministru sira sai hotu, tanba haree katak, kuantidade vasina ne’ebé ita simu 1.1 milliaun, ita iha 500 mill resin mak seidauk ezekuta, entaun ita-nia reseiu ne’e ninia prazu validade remata, ita kria eskándalu boot ida, tanba paíz sira-ne’ebé fó, fó ho hanoin atu salva ita-nia sidadaun sira-nia vida la’ós fó par ita atu estraga,” afirma PM Taur.

Tanba ne’e, Xefe Governu mós husu apoiu husi Parlamentu Nasionál (PN) nian, atu fó apoiu bá iha fim de semana, hodi halo kampaña sensibilizasau vasina b’a populasaun sira, nune’e labele estraga vasina rihun 500 resin ne’ebé seidauk ezekuta.

Nune’e mós, Prezidente Parlamentu Nasionál (PPN), Aniceto Guterres kompromete, sei kordena ho bankada sira, nune’e bele ajuda governu ho SIJK hodi halo kampaña nasionál vasinasaun iha munisípiu sira.(ant)