Taur Orienta IJE Halo Auditoria Bá Vasina Ne’ebé Hetan Estragus Iha HNGV

Smnewstl.com (Dili) — Primeiru-Ministru Taur Matan Ruak hafoin hetan informasaun kona-ba vasina ne’ebé hetan estragus iha Óspital Nasionál Guido Valadares (ONGV) iha loron 5 fulan agostu ne’e, orienta kedas ba Inspetór Jeral Estadu atu inísia prosesu auditoria ba asuntu refere, atu buka hatene kona-ba kauza husi problema ne’e.

Tuir informasaun preliminaria ne’ebé iha katak, iha loron 10 to’o 15 fulan juñu liubá, akontese instabilidade enerjia elétrika iha ONGV hodi prejudika ba sistema refrijerasaun armazenamentu vasina AstraZeneca nian, nune’e provoka irregularidades iha temperatura refrijeradór hodi hetan prejuízu sira-ne’e.

Tanba ne’e tuir konkluzaun no rekomendasaun hosi Konsellu Tékniku Nasionál Imunizasaun Timor-Leste (NITAG-TL- sigla portugés) hamutuk ho OMS, konklui katak ema sira ne’ebé simu vasina hosi loron 10 to’o 15 fulan juñu espesífiku iha Óspital Nasionál Guido Valadares konsideradu nulo/inválidu, nune’e rekomenda tebes atu simu filafali vasinasaun foun.

“Xefe Governu lamenta tebes ho insidente ne’e, no husu deskulpa ba profisionais saúde no utente sira ne’ebé simu ona vasina iha loron 10 to’o 15 fulan juñu iha ONGV,” dehan PM Taur Matan Ruak, liu husi komunikadu imprensa ne’ebé Smnewstl.com asesu husi Gabinete PM kuarta (11/08/21) ne’e.

Nune’e, orienta ona ba Ministériu Saúde atu kuidadu liután iha jestaun, nune’e iha tempu sira oin mai akontesimentu sira hanesan ne’e labele akontese tan.

Sorin seluk, Ministru Prezidénsia Konsellu Ministru, Fidélis Manuel Leite Magalhães informa, Xefe Governu, hakerek ona karta bá inspetór jerál estadu ho Organizasaun Mundiál Saúde (OMS), atu halo investigasaun kle’an bá kazu refere.

“Despaixu ne’e señór Primeiru-Ministru hakerek katak, orienta bá inspetór jerál estadu nian, emkolaborasaun ho OMS par atu halo levantamentu kle’an kona-ba tanba sá mak ida-ne’e akontese,” informa Ministru Fidélis kuarta (11/08/021) iha Palásiu Governu.

Oras ne’e dadauk, Ministériu Saúde aprezenta ona rajaun balun kona-ba vasina AstraZeneca ne’ebé estragus iha HNGV, maibé husi parte seluk mós prosesu investigasaun sei la’o hela.(ant)