Tama Ona Novembro, Ró Berlin Ramelau Seidauk Serteza To’o TL

Smnewstl.com 18-11-2021 (Dili) – Ró Berlin Ramelau to’o oras ne’e seidauk hatene klaru atu mai Timor Leste tamba hasoru hela failansu balun.

Antes ne’e, informasaun ne’ebé espalla iha públiku katak, Ró refere sei to’o iha fulan Setembru tinan ida-ne’e, maibé, realidade la akontese to’o tama tia ona ba Novembro maibe seidauk to’o deit.

Ba mudansa hirak ne’e, Prezidente APORTIL, Flávio Cardoso Neves konfirma, Autoridade APORTIL seidauk bele deklara bá públiku katak, bainhira mak ró Berlin bele Ramelau to’o mai Timor Leste.

Flávio Cardoso konfesa katak, APORTIL dadauk ne’e halo ona preparativus bá serimónia kulturál nian hodi simu husi kompañia bá governu.

“Pozisaun APORTIL prepara hela atu oinsá ita halo serimónia ró ne’e atu mai iha ne’e, ha’u hanoin ita prepara ba ida ne’ebá. Ha’u hanoin dia loloos nee ha’u seidauk hatete, mais agora dadauk ami preokupa oituan atu preparasau atu halo serimónia ba integra ne’e. Ha’u fi’ar katak, iha loron besik ne’e ró sei mai iha ne’e,” dehan Prezidente APORTIL, Flávio Cardoso Neves, iha servisu fatin APORTIL kinta ne’e.

Prezidente APORTIL ne’e relata, antes ne’e iha ona informasaun, ró Berlin Ramelau besik mai ona, maibé, tanba sei iha faillansu tékniku balun ne’ebé la’ós kompañia ho estadu Timor-Leste mak lakohi atu mai.

Maibé, tanba de’it husi badan klasifikasi (hanesan instituisaun ne’ebé halo inspesaun no sertifika fasilidade ró nian), tan ne’e sai kestaun bá tékniku sira iha terenu.

“Horseik 17 Novembru 2021, parte ida-ne’e hotu, kompaña halo kompletu hotu ona, tanba ne’e mak ita hein de’it, ha’u fi’ar katak, agora APORTIL prepara hela oinsá bele halo serimónia bá simu. Ita hatene ró ida-ne’e foun mai ita tenke halo kultura nian, tanba ita nia kontratu mós ita hetan finansiamentu ho governu Alemaña (German), tantu ró foun atu mai atraka iha ne’e, nia mós ita tenke halo selebrasaun, katak kompaña refere mai intrega di’ak ho ita, sei hala’o iha portu Dili,” tenik nia.

Flávio reafirma, APORTIL prepara ona Timoroan na’in 30, tanba ró Berlin Ramelau ne’e, sei fó oportunidade bá timor-oan sira ne’ebé mak iha esperiénsia kona-ba ró nian atu opera.

Alem de ne’e, husi parte kompañia mós sei fó treinamentu bá tripulante timoroan sira atu halo operasaun bá ró ne’e.

Entretantu, iha loron 31 maiu 2019, Governu Timor-Leste reprezenta hosi Ministru Transporte no Komunikasaun, José Agostinho da Silva, asina akórdu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlin-Ramelau.

Nune’e mós, ró refere konstrui husi kompañia Amadora Holandes Darmen Shipyard.

Projetu konstrusaun bá ró Berlin Ramelau ne’e, finansia fundus husi Governu Alemaña kontribui millaun $ 7,8 no Timor-Leste millaun $ 7,1.(ant)