Sulan Durante Semana Rua, Aban Governu Fó Lívre Fali Komunidade Iha Munisípiu Dili

Smnewstl.com 08-09-21 (Dili) – Governu liu husi reuniaun konsellu ministru deside fó lívre fila-fali bá komunidade iha munisípiu Dili, hafoin aplika konfinamentu obrigatóriu jerál durante semana-rua nia laran.

Ministru Prezidénsia Konsellu Ministru, Fidelis Leite Magalhães hatete, desizaun hapara konfinamentu obrigatóriu ne’e governu foti, hafoin rona tiha aprezentassaun kona-ba pontu situasaun epidemiolójika nasionál husi Sala Situasaun Sentru Integradu Jestaun Krize (SIJK) iha reuniaun konsellu minstru kuarta-feira ohin, iha ministériu finansas.

Fidelis Magalhães esplika, rezolusaun konfinamentu obrigatóriu ne’e vigora ne’e hela, sei termina iha loron 9 fulan Setembru tinan 2021 kalan tuku 23:59, tanba ne’e ezekutivu sei la extende tan ona.

“Ohin konsellu ministru hahú rona aprezentasaun husi SIJK Sala Situasau, hafoin análize ho kle’an, deside atu levanta impozisaun konfinamentu obrigatóriu jerál lockdown iha munisípiu Dili, hahú dia 9 aban kalan meia noite. Bainhira rezolusaun konfinamentu obrigatóriu vijente kaduka aban kalan sei la extende tan,” dehn Ministru Fidelis Magalhães hafoin remata enkontru konsellu ministru iha Ministériu Finansas, kuarta ohin.

Konfinamentu obrigatóriu laiha ona, sidadaun sira-ne’ebé mak kompleta ona vasina dalarua, bele halo movimentu iha territóriu Timor laran tomak, hodi atende bá nesessidade urjente sira, maibé tenki hatudu kartaun komprovativu vasina dalarua nian.

“Como laiha ona konfinamentu obrigatóriu iha Dili, iha munisípiu hotu-hotu inklui Dili ne’ebé mak iha serka sanitaria sei permite sidadaun hotu-hotu ne’ebé mak vasina dalarua ona, atu bele tama sai munisípiu hotu hetan nesesidade sira hanesan, aimoruk ka atu desloka sai husi perímetru sira-nian,” hateten Fidelis.

Tanba ne’e, governu husu sidadaun sira, atu kumpre nafain medidas prevensaun sira hanesan, fase liman, distansiamentu sosiál no seluk tan, nune’e bele prevene aan husi rísku kontájiu surtu Covid-19 ho variante Delta.

“Maibé konsellu ministru mós husu atu ita-nia sira-nia responsabilidade bá sira-nia saúde, família nia saúde bá komunidade nia saúde, atu kontinua tau iha prátika ho rigor, máskara, fase liman, distansiamentu, regras sira hotu ne’ebé ita rona ona hato’o husi Ministériu Saúde no pessoál saúde sira,” apela nia.

Governu nafatin servisu hamutuk ho sosiedade no mós instituisaun sosiál liu-liu konfisoens relojiozas no organizasaun sira seluk, nune’e bele iha komprimísu ida atu implementa protokolu ne’ebé Ministériu Saúde ho Organizasaun Mundiál Saúde fó sai ona.

Alem de ne’e, ezekutivu mós kontinua fó fi’ar bá autoridade seguransa hanesan polísia ho forsa armadas sira, atu aplika nafatin regras saúde nian bá sidadaun sira hodi bele halo tuir.

“Ita husu nafatin bá loja sira, bá motorísta sira, bá eventu família sira-nian, atu hotu-hotu kumpre nafatin regras sira hanesan uza máskara, halo distansiamentu, evita labele iha aglomerasaun boot, katak, iha komunidade nia le’et mak iha aglomerasaun boot, PNTL sei bá fó hanoin bá ita-boot sira par bele kumpre nafatin protokolu saúde ne’ebé iha,” afirma nia.

Ho levantamentu konfinamentu obrigatóriu ne’e, transporte públiku sira belel hahú fali atividade operasaun hanesan baibain, inklui loja no supermerkadu sira, maibé tenki kumpre nafatin regras prevensaun Covid-19 nian ne’ebé iha.(ant)