Subsídiu Bá Front Line, Kada Ema Sei Simu Dólar $ 5 to’o Dólar $ 25

Smnewstl.com (Dili) — Governu liu husi reuniaun konsellu ministu aprova ona alterasaun daruak bá dekretu-lei nu.17/2020, loron 30 fulan-abríl, ne’ebé kria suplementu remuneratóriu bá funsionáriu no ajente traballadór administrasaun públika sira.

Ministru Prezidénsia Konsellu Ministru, Fidélis Magalhães esplika, dekretu-lei foun ne’ebé Ministériu Finansas prepara antes ne’e, hetan veta husi Prezidente Repúblika, Francisco Guterres Lú-olo.

Nune’e, governu aprovasaun fali alterasaun bá dekretu-lei ne’ebé aprova bá dahuluk iha loron 30 fulan-abríl 2020, depois halo alterasaun dahuluk iha 2 Setembru 2020, no dadauk ne’e alterasaun bá daruak nian.

“Ne’ebé ho segunda alterasaun ida-ne’e la halakon direitu bá benefisiáriu sira, maibé atu regula di’ak liután de’it periódu atribuisaun bá direitu hirak ne’e, tanba direitu sira-ne’e benefisiáriu adkiri, bainhira sira presta servisu iha administrasaun públika iha esforsu luta kontra pandemia ne’ebé iha, no iha kontestu rísku ne’ebé sira enfrenta bainhira ezerse sira-nia funsaun,” dehan Ministru Fidélis Magalhães, kuarta (04/08/21) iha Palásiu Governu.

Ho alterasaun ne’e, nia periódu validade bá dekretu-lei ne’e hahú husi loron 3 fulan-abríl to’o loron 31 fulan-dezembru tinan 2021.

“Ho proposta alterasaun ida-ne’e, define di’ak liután periódu validade husi dia 3 de Abríl prolonga to’o 31 fulan-dezembru 2021, dekretu-lei ne’e mós hatur kedas benefisiáriu sira, sé-sé mak iha direitu, tanba ida-ne’e hanesan suplementu remuneratóriu ajuda bá ema-nia remuneratóriu tanba sira hala’o knár iha kontestu espesífiku ida-ne’ebé aprezenta rísku bá sira-nia aan no sira-nia família bainhira ajuda sidadaun sira seluk iha situasaun pandemia ida-ne’e,” subliña nia.

Suplementu remuneratóriu ne’e, sei atribui pessoál liña frente sira kompostu husi médiku, autoridade segunsa no defeza liu-liu Polísia Nasionál Timor-Leste (PNTL) no FALINTIL Forsa Defeza Timor-Leste (F-FDTL) inklui funsionáriu sira husi liña ministériu ne’ebé presta atividade servisu profisionál bá prevensaun Covid-19, ne’ebé liga direitamente bá vírus SARS-CoV-2.

Valór suplementu remuneratóriu ida-ne’e, sei finansia husi fundu Covid-19 nian, variasaun dólar $ 5 to’o dólar $ 25 kada loron, bazeia bá grau rísku sira-ne’ebé funsionáriu sira hasoru, tuir tabela aprova ho diploma ne’e.

Alterasaun hirak ne’ebé prevé iha diploma ne’e, prodús efeitu hahú husi loron 30 fulan-abríl tinan 2020, data tama iha vigór husi dekretu-lei ne’ebé oras ne’e altera.

Tanba ne’e, direitu bá suplementu sira-ne’e, sei prolonga to’o loron 31 fulan-dezembru tinan 2021, laiha prejuizu bá posibilidade posteriór hodi halo estesaun liu husi intervensaun lejislativa foun.(ant)