Submete Tarde, PPN La Admite Proposta 18 Halo Diskusaun

Smnewtl.com (06-12-21) – Prezidente Parlamentu Nasionál (PN), Aniceto Guterres la admite proposta 18 ne’ebé submete bá meza atu halo alterasaun bá Osamentu Jerál Estadu (OJE) 2022, tanba proposta refere hatama la tuir oras aprova iha líder bankada.

Iha proposta inisiál ne’ebé deputadu sira submete bá meza PN hamutuk 143, ne’ebé deputadu sira entende atu halo alterasaun bá OJE 2022 iha espesialidade iha liña ministériu sira inklui halakon verda iha fundu rezerva kontinjénsia.

Vise Prezidente PN, Maria Angelina Sarmento hateten, prazu bá submisaun proposta antes aprovasaun votasaun jeneralidade nian, maibé realidade, deputadu balun submete proposta liu ona oras aprovasaun finál jeneralidade.

 “Votasaun jeneralidade foin dadauk ne’e ita halo iha 6:30 besik 7 oras, maibé, proposta sira-ne’ebé admitidu ne’e 7 oras bá leten depois de votasaun mak proposta sira-ne’e tama, tuir guiaun ne’ebé mak iha konkodánsia ona iha líder bankada, asima tempu submisaun proposta alterasaun ne’e sei la hetan admisaun husi Prezidente Parlamentu,” Vise Prezidente PN, Maria Angelina Sarmento, iha PN, segunda ne’e.

Vise Prezidente PN ne’e haktuir, proposta ne’e mós husu atu hasai hotu osan husi fundu rezerva kontinjénsia, tan ne’e, meza rejeita, tanba tuir lei, fundu rezerva kontinjénsia investe 5%, ta ne’e, dadauk ne’e menus ona husi 5%.

Maria Angelina esplika, fundu rezerva kontinjénsia labele mamuk, tanba verda ne’e importante tebes, bainhira akontese situasaun extra-ordináriu ruma, governu bele responde ho lalais.

 “Tuir lei ejizénsia mínimu ka rezerva kontinjénsia ne’e 5%, no agora dadauk menus 5% ona, ita imazina kuandu akontese buat ruma ké orsamentu imprevístu ne’e governu labele responde, tanba ne’e mak ami meza rejeita proposta sira-ne’e, tanba fontes de alterasaun proposta OJE ida-ne’ebe não admitidu ne’e ida mak atu hasai hotu husi rezerva kontinjénsia, no planu atu halo rezerva kontinjénsia sai zero, ne’e labele,” esplika nia.

Nia afirma, bankada governu FRETILIN, PLP no KHUNTO prepara ona proposta alterasaun balun, maibé seidauk bele anunsia bá públiku, tanba seidauk halo diskusaun iha plénria.(ant)