Somotxo-Rui Pronto Hadia Diak Liu Tan FRETILIN, Laos Atu Harahun

Smnewstl.com (Dili) — Membru Komité Sentrál FRETILIN (CCF), José Agostinho Sequeira ‘Somotxo’ ho Rui Maria de Araújo preparadu ona, tanba ne’e iha intensaun forma pakote ida atu kompete bá eleisaun direta ou kongressu nasionál bá Prezidente partidu FRETILIN ho Sekretáriu Jerál.

Maibé, pakote ne’e halo nia kamarada balun iha CCF tauk, maibé Somotxo seidauk hatene rajaun saida sira tauk pakote refere.

“Ne’e pakote ida ne’ebé primeiru lugar intensaun, ha’u ko’alia dala hira ona katak, intensaun ne’e hakarak, depois intensaun ne’e maka sai forma pakote, pakote ne’e na’in-rua atu aban bainrua konkore eleisaun direta ou kongressu,” dehan José Agostinho Somotxo, hafoin partisipa serimónia komemorasaun loron FALINTIL bá dala-46 iha kuartel jenerál F-FDTL Fatuhada, Dili. (20/08/21).

Iha oportunidade ne’e, eis gerilleiru ne’e esplika, kria pakote ne’e normál, tanba prepara atu kompete bá iha eleisaun direta ou kongressu nasionál partidu nian hodi hili estrutura foun.

“Pakote ne’e normál, tan ida-ne’e mak asveses ha’u-nia maluk kamarada dalaruma haree ha’u ne’e tauk, ha’u seidauk husu ida-ida tanba saida mak imi tauk ha’u.? Ha’u hanesan komete krime ga ha’u hanesan kontra ona ema ruma ne’ebé labele kontra lulik,” subliña nia.

Atuál Deputadu bankada FRETILIN ne’e dezafia membru CCF tomak atu haree didi’ak estatutu partidu FRETILIN nian, tanba kongressu nasionál partidu FRETILIN nian sempre hala’o kada tinan lima.

“Uluk iha 4 de Outubru 2016, agora atu remata iha 4 de Outubru 2021, ne’e responsabilidade la’ós ha’u-nian de’it, responsabilidade ne’e kuádrus militantes husi FRETILIN nian,” hatete Somotxo.

Nune’e mós José Agostinho Sequeira ‘Somotxo’ rejeita ho informasaun ne’ebé espalla iha públiku katak, pakote nia ho Rui Araújo ne’e sei harahun partidu FRETILIN.

“Ha’u hanoin ida-ne’e la’ós atu harahun FRETILIN, mai atu hadi’a FRETILIN halo metin tan FRETILIN, tanba ami hotu-hotu tenki halo reflexaun bá ami ida-idak nia aan rasik, harahun FRETILIN querdizer que ami agora pakote ne’e atu halai, ha’u Somotxo desde idade ho 16 anos iha partidu ida-ne’e duni serví ho kargu oi-oin mai to’o 99 (1999) ne’ebé halai karik oras ne’e ha’u iha partidu seluk,” afirma Somotxo.

Maski nune’e membru CCF ne’e seidauk bele fó sai bá públiku kona-ba mudansa polítika saida mak pakote ne’e atu implementa iha partidu FRETILIN laran, bainhira hetan fi’ar husi militante no apoiante sira, tanba kongresu ou eleisaun direta seidauk realiza.(ant)