Sobrevivente 12 Novembro Nunka Husik Max Stahl Mesak, Reza Atu Rekopera Lalais

Smnewstl.com 22-10-2021 (Dili) – Komité 12 Novembru sente triste bainhira haree kondisaun saúde jornalista señór Max Stahl nian ne’ebé dadauk ne’e halo hela tratamentu intensivu iha Austrália.

Sekretáriu Jerál Komité 12 de Novembru, Sérgio Filomeno Marques ‘Amali’ hateten, jornalista señór Max Stahl nu’udar figura importante ida bá Timor-Leste, tanba iha situasaun ne’ebé difisil, Max Stahl ho aten brani hodi halo filmajen Timor nian hodi publika bá mundu internasionál.

Amali afirma, povu no nasaun Timor-Leste sei presiza jornalista Max Stahl nia prezensa iha Timor-Leste, nune’e bele transmite istória liu-liu akontesimentu masakre santa kruz 12 de Novembru iha tinan 1991 bá jerasaun foun sira bele hatene.

“Ami triste ema figura ida-ne’ebé mak hakarak duni sofre bá ita-nia rai Timor-Leste, tanba publika ita-nia prosesu luta ne’e la fasil, mesmu hasoru konsukuénsia barak iha ninia moris rasik, triste tanba Timor-Leste presiza ninia prezensa atu hatutan bá jerasaun sira ita-nia prosesu luta rasik, agora ho nia kondisaun hanesan ne’e labele prezensa, ne’ebé komité sente triste la halimar kuandu hatene katak, maun Max Stahl agora dadauk iha ospitál,” dehan Sekretáriu Jerál 12 de Novembru, Sérgio Filomeno ‘Amali’ bá smnewstl.com iha Komité 12 Novembru Balide, Dili, sesta ne’e.

Tempu badak, komité 12 Novembru sei tur hamutuk hodi tau hanoin ho mate restu sira seluk hodi halo esforsu másimu, nune’e bele ajuda Max Stahl atu bele rekopera lalais husi moras, tanba Max Stahl nia sakrifísiu fó bá Timor-Leste boot tebes.

Sobrevivente ne’e husu estadu Timor-Leste no Timoroan hotu, atu fó apoiu bá Max Stahl ne’ebé dadauk ne’e halo hela tratamentu saúde iha Austrália, tanba ospitál Austrália la’ós gratuita.

“Tanba ne’e mak ami sei enkontru iha tempu badak ne’e atu haree katak, saida ma kami bele halo, saida mak bele fó kontribui bá kondisaun maun Max Stahl nian, no la’ós ami de’it, ita-nia estadu tomak, tanba estadu ida-ne’e hamrik karik nia prosesu ne’e naruk. Entaun husu ema Timoroan hotu tantu ita-nia estadu oinsá mak bele haree apoiu par ninia saúde ne’e bele rekopera,” dehan Amali.

Maski nune’e, Sekretáriu Jerál 12 Novembru ne’e haktuir, nia parte seidauk iha informasaun kona-ba karik iha ona parte ruma mak fó ona apoiu bá Max Stahl durante halo tratamentu saúde iha Austrália.

“Ha’u seidauk hatene loloos sobre nia tama ospitál ne’e sé-sé mak apoiu ona bá iha ne’ebá, ita-nia governu apoiu ona ga la’e, tanba ospitál dalaruma iha Austrália la’ós gratuita, tanba ne’e mak ami seidauk hetan informasaun sobre parte ne’ebé mak apoiu ona bá atu rekopera maun Max Stahl ninia saúde rasik,” dehan nia.

Nia hatutan, desde inísiu, Max Stahl sofre moras iha parte kakorok, nune’e difisil Max Stahl ko’alia, tanba ko’alia la moos, tan ne’e ikus mai, tenki evakua bá halo tratamentu saúde iha ospitál iha Austrália.(ant)