Simu Uma Husi Xanana Gusmao, Inan Faluk Beatris da Silva Hasai Matawen

Smnewstl.com (DILI)- Beatris da Silva Guterres, inan faluk ida husi Aldeia Funu Hotu, Suco Culuhun, Posto Administrativo Cristo Rei, Municipio Dili durante ne’e moris mesak ho nia oan mane nen iha uma ida ho kondisaun la favaravel tebes, hafoin kaben husik hela sira iha tinan 7 liu ba.

Situasaun ne’e halo sira sai susar tebes basa ema ne’ebe sai hanesan aliserse (tulang pungun) husik hela sira.

Aliende sai inan, Beatris mos tenki sai aman (buka hahan) hodi fo han oan nain nen liu husi dalan faan dosi.

Rendimentu faan dosi ne’ebe ki’ik tebes halo sira aliende susar ba aihan hado’ok mos oan nain nen nia futuru husi mehi hanesan ema seluk mak iha kbi’it naton.

Aliende moris tamba lakon laen, inan ho oan nain nen mos hela deit iha uma ho kondidasaun la favoravel basa uma nia lolon hafutar deit ho koak ne’ebe susar atu imagina bele livre husi udan no anin.

Moris iha situasaun defisil, la halakon sira nia espiritu atu la lakon esperansa hodi hasae nafatin orasaun ba aman maromak nune’e loron ruma bele hetan nia grasa.

Teki-teki iha tinan kotuk, bainhira lider Nacional Kay Rala Xanana Gusmao marka prezensa iha aldeia refere, komunidade baluk hakbesik relata sofrementu inan faluk ho oan nain.

Rona lian halerik ne’e, maske la hola ona parte iha executivo, maibe eis Presidente Republika no Chefe Executivo la husik le’et deit.

Kontinua asume responsabilidade hanesan aman no lider ida ne’ebe nunka mais hakarak atu hare nia povu moris susar, Xanana deside buka dalan konstroi kedas uma ida ba inan faluk nee.

Uma refere kompleta kedas ho fasilidades mak hanesan kuartu rua kompleta ho kama, sala vizita, dapur, haris fatin inklui baranda.

Maske lori tempu naruk, maibe iha loron Segunda-feira, 02-08-2021, bainhira simu save uma nian husi Kay Rala Xanana Gusmao expresaun triste kahur ho kontenti hafutar inan faluk Beatris basa buat ne’ebe konsiderado hanesan mehi deit nakfilak sai realidade.

“Hau sente kontenti, hau nia katuas mate tia ona e ami la hatene atu depebdenti los ba se’e, maibe tinan kotuk Avo Nana mosu iha ne’e no halo uma ida nee hodi ohin ami simu, hau sente koalia la hatene,”haktuir Betaris.

Ba Xanana Gusmao, inan faluk ho oan nain nen promete atu hasae nafatin orasaun ba aman maromak nune’e fo vida naruk nafatin atu kontinua tulun mos sira seluk ne’ebe durante ne’e halerik nonok hela no seidauk hetan atensaun.

“Ami reza makas ba aman maromak atu haraik nafatin saude diak no vida naruk ba Avo Nana hodi nune’e bele hadia povu no rai ida ne’e”(rio)