Sei Akontese Laniña Iha Teritorio, Alerta Matan Moris Neon Nain ba Populasaun Hela Iha Area Risku Dezastre

Smnewstl.com 13-09-2021 (Dili) — Governo liu husi Sekretáriu Estadu Protesaun Sivíl (SEPS), kontinua alerta bá populasaun sira-ne’ebé hela iha área rísku bá dezastre atu kuidadu aan nafatin, nune’e bele prevene husi dezastre naturais.

Diretór Jerál Protesaun Sivil, Superintendente Polísia Ismael Babo hateten, SEPS simu informasaun no notifikasaun husi meteorolojia Nasoens Unidas nian katak, tinan 2021 ne’e, sei akontese laniña iha Timor-Leste, tanba udan sei mai sedu no la tuir ona nia tempu.

Nune’e, iha tendénsia boot atu akontese tan dezastre naturais hanesan iha dia 4 Abríl fois lalais ne’e.

“Ita simu informasaun notifikasaun husi Nasoens Unidas katak, tinan ida-ne’e 2021, udan mai sedu la hanesan tinan kotuk, ida-ne’e mak sira alerta mai ita katak, tinan ida-ne’e udan mai sedu tama ona iha Setembru udan komesa mai ona. Sira mós fó hanoin mai ita katak, tinan ida-ne’e nia poténsia bá udan ne’e sei boot hanesan Abríl liu bá, husu bá ita katak, alerta bele akontese fali dezastre hanesan 4 de Abríl,” dehan Diretór Jerál, Ismael Babo, Segunda ohin, iha nia servisu fatin SEPS.

Ismael Babo esplika, tuir loloos, fulan Setembru ne’e iha hela periódu seka, maibé enfelizmente udan mai sedu tiha ona, tanba nasaun sira iha mundu, udan boot hodi afeta to’o mai Timor-Leste.

Tanba ne’e, nia husu populasaun ne’ebé hela iha área sirku hanesan, mota ninin, tasi ibun no foho lolon, atu atensaun, bainhira mosu udan boot, tenki evakua lalais bá fatin seguru ne’ebé mak antes uza ona hodi asegura aan.

“Tuir loos ne’e, Setembru tama hela iha periódu seka, udan mai sedu realidade udan mai sedu duni, nune’e protesaun sivil liu husi média nia papel importante teb-tebes par atu sosializa informasaun i habelar bá ita-nia sidadaun sira liu-liu bá sira-ne’ebé mak hela iha área rísku bá dezastre, mota laran, tasi ibun no mós foho lolon sira-ne’e fasil rai atu halai, ho situasaun udan mai dadauk ona ne’e, husu par ita hotu alerta,” afirma nia.

Tanba ne’e, agora dadauk, SEPS kordena ona ho parseiru internasionál sira, sosiedade sivil no mós liña ministériu sira hodi fahe informasaun bá populasaun sira, atu prevene aan husi fatin rísku sira.

Diretór Jerál SEPS ne’e mós alerta bá viajente sira-ne’ebé halo viajen bá munisípiu atu la’o ho kuidadu, tanba ténsidade udan boot bele provoka asidente no insidente iha dalan.(ant)