SEA Análiza Ona Sampel Husi Perfurasaun Mina Feto Kmaus

Smnewstl.com 18-11-2021 (Dili) – Sekretáriu Estadu Ambiente (SEA) orienta ona Diresaun Jerál Kontrolu Poluisaun atu foti sampel husi possu mina Feto Kmaus, nune’e bele halo análize atu bele hatene saida mak kontein iha sampel poluisaun.

Sai preukupasaun públiku katak, prosesu perfurasaun mina matan iha possu Feto Kmaus Munisípiu Covalima ne’e, kompañia Timor Resources husik sai fo’er mina bá komunidade sira-nia to’os hodi fo impaktu ladiak ba ambiental.

Sekretáriu Estadu Ambiente, Demétrio do Amaral de Carvalho esplika, laos nia parte mak atribui sertifikadu lisensiamentu impaktu ambiental bá kompañia Timor Resources, maibe Ministériu Petróleu Minerais (MPM) liu husi Autoridade Nasionál Petróleu Minerais (ANPM) bazeia bá lei orgánika oitavu governu konstitusionál nian.

Executivo ne’e rekuinese, maske assuntu ambiente ein-jerál kompeténsia SEA nian, maibé, fahe ona bá rua, iha área Petróleu MPM mak fó sertifikadu lisensiamentu ambiental, no ambiental ein-jerál kabe ba kompeténsia SEA nian.

“Ami haruka ona diresaun jerál kontrola poluisaun bá foti sampel iha Suai, ita espera iha rekolla sampel ka amostra sira, ita sei halo análize saida mak kontein iha sampel poluisaun nian,” dehan Sekretáriu Estadu Ambiente, Demétrio Amaral, hafoin remata enkontru ho PM Taur iha Palásiu Governu, kinta ne’e.

Nia hatutan, rezultado husi sampel ne’ebe foti sei rekomenda fali bá kompañia Timor Resources atu bele halo jestaun bá impaktu ambiental ho prudente liután.

Tuir Diometrioz, amostra ne’ebe foti posibilidade sei halo análize iha laboratóriu nasionál água no saneamentu nian. Kuandu labele maka posibilidade mós sei haruka bá fatin seluk ne’ebé bele halo análize bá alcaline no hidro karbonu ne’e rasik.(ant)