Saudozu Ma’huno Nia Isin Mate Sei Tau Provizorio Iha Museum Rezistensia, Halo’ot Iha Jardim dos Herois Metinaro

Smnewstl.com 25-09-2021 (Dili) – Ministériu Assuntu Kombatentes Libertasaun Nasionál (MAKLN) ho Sekretáriu Estadu Assuntu Veteranus, prepara ona fatin iha muzeu rezisténsia hodi lori saudozu José António Gomes da Costa ho kódiku ‘Ma’huno Bulerek Karathayano’ nia isin mate bá tau provizóriu nune’e sidadaun sira bele bá presta omenajen hafoin lori bá halot.

Tuir informasaun ne’ebe SMNews asesu komfirma katak, maske data fiksu ba halo’ot saudozu sei iha hela kordenasaun, maibe sei tau provizorio isin mate iha Muzeum rezistensia no antes halo’ot sei lori mos ba iha rai moris fatin Laleia-Manatuto durante oras ida, hafoin fila mai halo’ot iha Jardim dos Herois Metinaro.

Xefe Governu Taur Matan Ruak hato’o ho espoza Isabel Ferreira haka’at ona ba presta omenajen ikus bá saudozu iha mate uma Pantai-kelapa, Dili, Sábdu ne’e.

“Señór Ministru Meta Malik ho señór Sekretáriu Estadu Gil (Oan Soru) agora prepara kondisoens iha muzeu depois sei bá tau tempu balun iha ne’ebá antes ita lori bá fatin ikus,” dehan PM Taur,.

Hanesan mos gerlheiru, Taur Matan Ruak dehan Timor-Leste lakon ona líder no fundadór nasaun di’ak ida uluk luta makas bá ukun rasik aan.

“Ita lakon ita-nia erói ida, ou fundadór nasaun nian, ita-nia nasaun lakon boot, ne’ebé ita husu aman Maromak fó fatin bá rohan laek bá nia, husi nia no ho sira hotu ne’ebé bá ona Maromak nia sorin, kontinua tau matan bá ita sira-ne’ebé sei moris atu hatutan obra ne’ebé sira husik hela,” subliña PM.

PM Taur mós husu saudozu sira-ne’ebé fila ona bá mundu seluk, atu fó nafatin forsa no korajen bá família no oan ki’ak sira, nune’e bele kontinua moris iha situasaun difísil ida-ne’e.

“Nasaun tomak iha sira-nia sorin, povu tomak sira-nia sorin, tanba ita-nia maun, ninia isin lolon mak mate, maibé ninia memória, obra sempre dura sei hela, sei hanoin husi jerasaun bá jerasaun,” afirma nia.

Entretantu, saudozu José António Gomes da Costa ho kódiku ‘Ma’huno Bulerek Karathayano’, hakotu iis iha Ospitál Naisonál Guidu Valadares (HNGV), iha tuku 5 ho balun, tanba sofre moras komplikadu.

Saudozu mate ho idade (72) husik hela fen kaben atuál Deputada bankada CNRT, Maria Terezinha Viegas, ho oan ki’ak na’in 3 feto ida mane na’in 2.(ant)