Sala Interpreta Desizaun Governo, Horseik PNTL Prende Transporte Publiku 36

Smnewstl.com 10-09-2021 (Dili) – Polísia Nasionál Timor-Leste (PNTL) liu husi departamentu tránzitu nasionál, liberta fali ona transporte públiku 36 ne’ebé mak viola regras konfinamentu obrigatóriu iha loron 9 fulan Setembru horseik.

Iha kinta loron 9 fulan Setembru tinan 2021, polísia tránzitu munisípiu Dili, prende transporte públiku 36 ne’ebé kompostu husi táxi 18 no mós mikrolete 18, tanba viola regras konfinamentu obrigatóriu.

Komandante Polísia Tránzitu Nasionál, Inspetór Xefe, Domingos Sarmento da Gama informa, konfinamentu obrigatóriu iha munisípiu Dili remata iha loron 9 fulan Setembru kalan iha oras 23;59, maibé kondutór sira balun interpreta sala.

“Desizaun husi konfinamentu obrigatóriu jerál ne’e dehan katak, la extende ona remata iha dia 9, signifika dia 9 oras 23;59 ou tama bá oras 00;00 bá dia 10 foin mak konfinamentu obrigartóriu jerál ne’e remata.

Maibé, horseik ita-nia kondutór sira interpreta data konfinamentu obrigatóriu jerál ne’e sala, entun komandu fó orden ami halo operasaun, atuasaun bá kondutores transporte públiku sira mikrolete ho táxi hamutuk 36 ne’ebé mak ita prende mai,” dehan Inspetór Domingos Gama, sesta ohin, iha Komandu Polísia Munisípiu Dili.

Tanba ne’e, bazeia bá orden husi komandu, polísia halo apreensaun bá transporte hirak ne’e hodi submete bá identifikasaun, miabé la aplika multa bá sira, maibé fó xamada sira atu kumpre regras konfinamentu obrigatóriu.

“Sira la kona multa ruma selu koimas, ita fó xamada atensaun de’it, tanba ita haree bá mai situasaun hirak ne’e, maibé ita nafatin konsidera hanesan desobediénsia, ne’ebé ita halo identifikasaun bá sira depois ita liberta sira, ohin dader sira ida-idak lori sira-nia transporte fila,” informa nia.

Tanba ne’e, hahú ohin dia 10 Setembru ne’e, atividade sira hotu komesa ona halo sirkulasaun hanesan baibain, maibé tenki iha dokumentu no asessores ne’ebé kompletu.

Domingos Gama hatutan, bá oin, polísia tránzitu sei aplika regras kódiku estrada no lei kódiku estrada, husu kumpre protokolu saúde ne’ebé organizasaun mundiál saúde fó sai ona.(ant)