Rede Bá Rai Deklara La Impede Dezenvolvimentu Nasionál

Smnewstl.com (Dili) — Organizasaun sosiedade sivil Rede bá Rai deklara, la impede prosesu dezenvolvimentu nasionál iha Timor-Leste, tanba rede bá rai halo advokasia hodi defende komunidade sira ne’ebé laiha forsa bainhira estadu foti sira-nia hodi halo dezenvolvimentu.

Porta-voz Rede bá Rai, Jemicarter Moniz hateten, rede bá rai hanesan organizasaun sosiedade sivil ho membru hamutuk 24 kompostu husi ONG lokál, nasionál no internasionál ne’ebé harii iha loron 12 fulan-marsu tinan 2001, atu hala’o servisu bá assuntu rai no hela fatin iha Timor-Leste.

Liu-liu halo monitorizasaun bá lei no polítika ne’ebé prodús husi governu no Parlamentu Nasionál, no halo mós akompañamentu bá kazu edukasaun, legál no mobilizasaun komunidade.

Ne’eduni, liu husi servisu akompañamentu bá kazu sira-ne’ebé ho natureza disputas hanesan kazu sidade universidade iha munisípiu Aileu, alargamentu kuartel jerál PNTL Kaikoli, konstrusaun aeroportu komoro, arte moris no gembel.

“Dalaruma hamosu persepsaun ida iha públiku katak, rede bá rai ou organizasaun sosiedade sivil sira mak sempre impede lala’ok dezenvolvimentu, ho nune’e, rede bá rai hakarak atu klarifika bá públiku katak, ida-ne’e laloos, komunidade sira sente katak, sira forsa laiha bainhira estadu atu foti rai komunidade sira-nian bá dezenvolvimentu,” dehan Jemicarter Moniz, liu husi komferénsia imprensa Tersa (03/08/21), iha Haburas fsrol, Dili.

Liu husi rede bá rai maka, komunidade sira mak rejista kazu iha rede bá rai, no husu tulun atu akompaña sira iha parte jurídika, tanba rede bá rai ejíste ho ekipa legál ne’ebé kompostu husi advogadu sira.

Tanba ne’e, Jemicarter Moniz husu instituisaun estadu sira no públiku tomak atu labele kondena organizasaun sosiedade sivil rede bá rai sempre impede prosesu dezenvolvimentu nasionál sira.

“Rede bá Rai hala’o servisu tuir estatutu, prinsípiu no vizaun rede bá rai nian katak, povu Timor-Leste ne’ebé moris fatin ho direitu no asesu bá rai no hela fatin iha Timor-Leste ne’ebé mak justu no Sustentável, tanba ne’e sai ona dever husi rede bá rai atu defende direitu bá rai no komunidade sira-nian,” afirma nia.

Sorin seluk, Koordenadór Nasionál Rede bá Rai, Hortencio Pedro Vieira reforsa, rede bá rai durante ne’e la hetan presaun husi estadu, maibé mosu opiniaun balun ne’ebé desvaloriza rede bá rai nia servisu advokasia.

“Tanba iha ema balun tenta servisu ne’ebé mak di’ak tebes husi rede bá rai atu fó apoiu jurídiku bá ita-nia komunidade sira, maibé balun tanba ladún kontente, entaun atu desvaloriza fali servisu advokasia ne’ebé mak di’ak tebes,” lamenta nia.

Pedro Vieira hatutan, iha ema balun ne’ebé servisu iha instituisaun estadu, dalaruma servisu la tuir prosedimentu ne’ebé iha.

Tanba ne’e nia afirma, prosesu diskusaun bá lei rai no lei espropriasaun ne’e lori tempu naruk tebes, maibé iha implementasaun la tuir nia dalan.(ant)