RAEOA Seidauk Ezekuta Osan Milliaun $ 13 Bá Ró Haksolok

Smnewstl.com (Dili) — Prezidente Autoridade Rejiaun Administrativa Espesiál Oe-cusse Ambenu no Zona Espesiál Ekonomia Sosiál Merkadu Timor-Leste (RAEOA-ZEESM-TL), Arsénio Paixão Bano hateten, parte autoridade RAEOA seidauk ezekuta orsamentu milliaun $ 14 ne’e, tanba prosesu negosiasaun bá estaleiru la’o hela.

“Seidauk, ita so sei kuandu progressu ne’e la’o, tanba ne’e mak ha’u dehan, progressu ne’e la’o di’ak, ita foin mak hasai osan oituan atu bá halo hotu negosiasaun,” informa Arsénio Bano, Segunda (02/08/21) hafoin remata enkontru ho Xefe Governu, Taur Matan Ruak, iha rezidénsia Farol, Dili.

Arsénio Bano promete, sei hakerek relatóriu eskrita bá Primeiru-Ministru, Taur Matan Ruak, kona-ba progressu konstrusaun ró haksolok.

Nia hatutan, autoridade RAEOA-ZEESM-TL mak sei kontrola estaleiru sira, nune’e bele fasilita mós ró seluk halo manutensaun, hodi nune’e osan bele tama bá konta RAEOA nian.

“Agora Oe-cusse kontrola estaleiru, Haksolok halo ona progressu atu haree komesa hahú fali oinsá, relatóriu eskrita sei la’o hela. Progressu la’o di’ak, ha’u sei hato’o relatóriu eskrita bá Primeiru-Ministru, Haksolok iha $ 13 milloens ami maneja pagamentu ne’e so progressu negosiasaun la’o dadauk,” afirma nia.

Durante ne’e, eis Prezidente Autoridade RAEOA-ZEESM-TL, Marí Alkatiri fó apoiu makas, liu-liu iha prosesu negosiasaun bá estaleiru nian.

“Doutór Marí (Alkatiri) ajuda makas iha ne’e, negosiasaun como estaleiru ne’e ita kontrola ona, ró seluk bele hadi’a mós iha ita-nia estaleiru i hatama osan rekopera osan,” informa nia.

Ne’eduni Arsénio afirma, sira sei haree faze tuir bá faze to’o hahú negosiasaun bá finalizasaun nian, maibé importante mak asegura kontrolu situasaun bá ró Haksolok.

“Ró Haksolok hanesan ohin ha’u dehan, ita sei haree por faze to’o negosiasaun hotu to’o ita hahú fila-fali finishing, hanesan ohin ha’u dehan, relatóriu eskrita sei mai ha’u fi’ar katak, tinan ida-ne’e ita sei halo progressu, sé tinan ida-ne’e tinan oin hotu, importante agora kontrola situasaun bá ró Haksolok nian,” subliña nia.(ant)