Projeitu Irrigasaun Laivai Ho Galata, Governu Autoriza Loke Prosedimentu Aprovizionamentu Ajudikasaun

Smnewstl.com 06-10-2021 (Dili) – Konsellu Ministru halo deliberasaun atu autoriza loke prosedimentu aprovizionamentu bá ajudikasaun kontratu públiku bá projetu konstrusaun irrigasaun Laivai iha Munisípiu Lautém no mós irigasaun iha Galata Postu Administrativu Venilale Munisípiu Baucau.

Proposta ne’e aprezenta husi Ministru Agrikultura no Peskas (MAP), Pedro dos Reis, iha reuniaun konsellu ministru ordináriu, ne’ebé prezide husi Primeiru-Ministru, Taur Matan Ruak.

“Konsellu ministru mós ohin delibera atu autoriza abertura bá prosedimentu bá ajudikasaun kontratu públiku rua kona-ba projetu konstrusaun bá irrigasaun iha Laivai munisípiu Lautém no Galata iha munisípiu Baucau,” informa Ministru Prezidénsia Konsellu Ministru, Fidélis Magalhães, iha Palásiu Governu, kuarta ohin.

Entretantu, projetu irrigasaun Galata postu administrativu Venilale sei kobre área ektare 600, no sei benefisia uma-ka’in 750.

Enkuantu, projetu irrigasaun Laivai munisípiu Lautém sei kobre natar ektare 300, no mós natar ektare 176 ne’ebé sei benefisia uma-ka’in 435.(ant)