Professór Eskola Filiál Railaku Vila Halerik ba Horta, Hakerek Relatóriu Ho Liman

Smnewstl.com 08-02-2022 (Ermera) — Professores sira ne’ebé hanorin iha Eskola Bázika Filiál Railaku Vila Munisípiu Ermera husu Eis Prezidente Repúblika (PR), José Ramos-Horta atu apoiu komputadór ho mákina imprime sira, tanba durante ne’e sira hakerek relatóriu ho liman de’it.

Manorin na’in sira hato’o kestaun ne’e, bainhira Premiadu Nobel da Páz ne’e halo vizita supreza hodi oferese bola Futeból rua bá estudante sira iha eskola Filiál Railaku.

“Ami só preukupa de’it komputador, ne’ebé ami-nia relatóriu iha ne’e ami sempre hakerek ho liman de’it, importante ida ami-nia kbiit la to’o ne’e uluk tiha lai, tanba ne’e importante tebes,” dehan Koordenadora Eskola Bazika Filial Railako Vila, Rosita Soares, hafoin simu vizita Eis PR José Ramos-Horta, iha eskola Filiál Railaku Vila, Munisípiu Ermera, Tersa-feira ne’e.

Rosita Soares informa, durante ne’e laiha vizita ruma husi Ministériu Edukasaun rasik no mós ukun sira, atu nune’e sira bele hato’o netik difikuldade liu-liu ligadu bá fasilidade ne’ebé sira hasoru, nune’e bele apoiu sira.

Tanba ne’e, liu husi oportunidade ne’ebé hetan vizita husi Eis PR, José Ramos-Horta ne’e, sira bele hato’o preukupasaun sira-ne’e atu bele apoiu sira, nune’e bele fasilita sira hodi halo servisu.

“Ne’ebé ami aproveita oportunidade ho suaexelénsia mai ne’e ami hato’o kedas ami-nia susar ga ami-nia fasilidade sira iha eskola sei falta ne’e ami hato’o kedas, tanba durante ne’e laiha Maun balun atu vizita ami. Karik bá futuru ne’e mak ami lahatene, maibé ohin loron ami iha oportunidade di’ak,” subliña Koordenadora Eskola Bázika Filiál Railaku ne’e.

Hatán bá preukupasaun ne’e, Eis PR, José Ramos-Horta rejista pruekupasaun ne’e, no promete sei apoiu komputador ida ho mákina imprime ida inklui tinta, nune’e bele fasilita professores sira-ne’e hodi halo servisu.

“Sira-nia casa de banho iha, komputadór ida folin hira.? Okay ha’u haree tok sé iha ha’u oferese ida, komputadór ho printer ho tinta,” dehan Eis PR, Horta.

José Ramos-Horta afirma, apoiu ne’ebé nia fó la’ós tanba eleisaun besik ona atu buka votus, maibé desde tinan 10 bá kotuk, konsege fó apoiu ona bá eskola no mós eskuádra Polísia balun.

“La’e ha’u ajuda la’ós de’it tanba eleisaun, tanba balun hatete, eleisaun ne’e nia fahe ona, uluk kedas Polísia iha Fatuberliu ne’ebá sira-nia komputadór tinan 10 liu bá ha’u oferese kompletu, depois tinan 2 liu bá ha’u fali iha ne’ebá sira hetete, komputadór ne’ebé ita oferese ne’e mak ne’e, agora tuan ona, entaun ha’u oferese tan foun ida bá sira,” dehan Horta.

Entretantu, iha vizita ne’e, Premiadu Nobel da Páz, José Ramos-Horta mós oferese bola Futeból rua bá estudante sira iha Eskola Bázika Filiál Railaku Vila, atu nune’e estudante sira bele uza bá atividade desportu.(ant)