Prizaun Becora Reativa Hikas ba Publiku Hodi Simu Vizita Husi Familia Mak Sala

Smnewstl.com Media Online — Estabelesimentu Prizaun Becora hahú reativa hikas oráriu bá vizitór sira-ne’ebé hakarak atu vizita maluk maksalak na’in sira iha prizaun Becora, hafoin taka tanba kauza husi Pandemia Covid-19.

Diretór Estebelesimentu Prizaun Becora, João Domingos informa, prizaun Becora loke fali oráriu bá vizitante sira-ne’e, tanba Ministru Justisa hasai ona despaixu.

“Ami loke ona vizita bá ita-nia populasaun prizionál sira ita-nia maluk maksalak na’in sira, hahú ohin, baze bá despaixu Ministru Justisa nian liu husi n°.044 iha dia 22 de Juñu, ami simu tiha despaixu ida-ne’e ami avizu kedas bá família liu husi média par ema hotu-hotu kobre vizita fali ita-nia maluk sira-ne’ebé estadia iha fatin ida-ne’e,” dehan Diretór Estebelesimentu Prizaun, João Domingos, Segunda (26/07/21), iha knár fatin prizaun Becora, Dili.

Liu husi vizita bá maluk sala na’in sira iha prizaun ne’e mós, parte ida atu labele afeta bá dadur sira-nia psikolojia, bainhira dok husi sira-nia família.

“Hanesan ita hotu hatene katak, rajaun ita loke fali vizita ida-ne’e katak, ita-nia maluk sira dok husi sira-nia família, ita bele halo prevensaun kona-ba moras Covid-19, moras sira seluk, maibé ita hotu hatene katak, termu doutór sira hatene katak, moras hotu-hotu ne’e mai husi kontribuisaun hanoin barak,” subliña nia.

Bá vizitante sira, Diretór Estebelesimentu Prizaun Becora ne’e husu, bainhira hakarak vizita dadur sira, tenki aprezenta provas hanesan kartaun eleitorál ka Billete Identidade (BI) no mós kartaun vasinasaun ne’ebé kompleta ona vasina dalarua.

Maibé mós sujeita nafatin bá regras ka protokolu saúde nian hanesan, uza máskara, fase liman, distansia sosiál, bainhira tama iha portaun, guarda prizionál sira sei desinfeta molok vizita família dadur sira.

“Ida fali mak tenki aprezenta provas ne’ebé apropriádu, maka kartaun eleitorál, BI (Billete Identidade), BI laiha bele passaporte, maibé tenki kompleta ho kartaun vasinasaun, kartaun vasinasaun mesak, ami seidauk bele permite, tanba kartaun vasinasaun la tau foto, entaun kartaun vasinasaun ema ida nian ema na’in-3 bele uza,” nia hatutan.

João dehan, sira impoin tan regra balun liu-liu bandu vizitór ho dadur, bainhira hasoru malu labele hakuak no rei malu ka ka’er liman, maibé ka’er de’it liman bá ida-idak nian fuan, nu’udar meius ida kontaktu malu husi fuan bá fuan.

“Regras ne’ebé ami alarga tan par moras li’ur labele da’et mai ami maka, hanesan ita timoroan kuandu hasoru malu foin primeira ves tenki ka’er liman, hakuak, rei malu, tanis, ida-ne’e ita evita, naton de’it ita ka’er bá ita-nia fuan ne’e katak, ita kontaktu ona husi fuan bá fuan, hodi nune’e labele ka’er liman no rei malu,” informa nia.

Nia akresenta, uluk kada loron, sira simu vizitante husi ema na’in 25 to’o 30, maibé iha situasaun Covid-19 ne’e, guarda prizionál sei simu de’it vizitór ema na’in 14 to’o 15, no mós dadur na’in 15, nune’e bele iha distansia metru ida entre sira.

Dadauk ne’e, totál dadur iha prizaun Becora hamutuk 536, husi númeru ne’e, ema na’in 515 mak simu ona vasina bá doze primeiru, no na’in 21 seidauk simu vasina tanba moras komplikadu no na’in ida mak sei minor idade hela.

Nune’e, iha prizioneiru besik na’in 200 ona mak simu vasina iha segunda doze.(ant)