Primeiro Ministro Anthony Albanese Kontaktu Xanana Gusmão

Smnewstl.com – Primeiru-Ministru Austrália, Anthony Albanese kontratula no dezeja susesu Primeiru-Ministru, Kay Rala Xanana Gusmão ninia governasaun.

Xefe Governu Austrália Anthony Albanese informa asuntu ne’e durante kontaktu via telefone direita ho PM Xanana, ohin dader iha Palasiu Governu, Dili.

Tuir komunikadu ne’ebe Smnews asesu komfirma, PM Austrália apresia eleisaun parlamentár tinan ne’e, ne’ebe la’o ho ambiente demokrasia no paz hodi povu fó fiar ba formasaun IX Governu.

Xefe Governu Austrália iha esperansa boot atu servisu hamutuk ho IX Governu Konstitusionál ne’ebé PM Kay Rala Xanana lidera.

PM nain rua prontu lori governu rua servisu no koopera hamutuk, tanba ida ne’e hanesan era foun iha relasaun entre rai rua.

Iha konversa amizade ne’e, PM Austrália mós konvida PM Xanana atu hala’o vizita ba Austrália iha tinan oin hodi diskute no hametin liutan kooperasaun bilaterál entre rai rua. Nune’e PM Xanana mós konvida hikas Xefe Governu Austrália atu vizita mós Timor-Leste.

Iha primeira semana IX Governu Konstitusional, Primeiru-Ministru Xanana simu vizita Ministra Negósiu Estranjeiru Austrália Senadora Penny Wong hodi diskute no hametin kooperasaun bilateral no apoia dezenvolvimentu infraestrutura Timor-Leste ba oin. (Smnews)