Prezidente CNRT Fiar Kapasidade OJP Hodi Lidera CNRT Iha Futuru

Smnewstl.com -Díli, 12 Marsu 2023 Prezidente Partidu CNRT, Kay Rala Xanana Gusmão fiar katak, Organição Juventude Partidu – OJP – CNRT sai fatór sustentabilidade partidu CNRT iha future.

Líder polítiku ne’e deklara katak, partidu CNRT sei la mate, tanba labarik no joven sira, komesa kompriende ona, misaun no vizaun partidu nian, hodi garante dezenvolvimentu.

“Iha ne’e partidu CNRT sei la mate, tanba labarik-oan sira ne’e hotu,  maka imi OJP fatór sustentabilidade ba partidu CNRT nian. Kuandu ita temi sustetabilidade signifika, kakutak tenke nakonu, badinas, servisu hanoin, ita hanoin, ba hanoin mai, ita badinas de’it ita-nia ain maka moras, tanba ita nia  kakutak la funsiona husi ulun to’o ain. Imi maka sustentabilidade partidu no fiar katak imi sei kaer partidu to’o imi nia oan sira, ne’e duni presiza preparasaun nafatin,”Dezafia Xanana Gusmão.

Ba Xanana Gusmão, edukasaun polítika husi família no baze la’o dadaun no hatudu katak, sobervivénsia partidu nia sai garantidu, hodi transzisaun jerasionál, hodi materializa vizaun partidu nian, hodi serbi’I povu no nasaun.

“Ha’u ko’alia ho joven sira imi buka aplika aan agora ba to’o dia 21 fulan Maiu , Depois iha lian portugués dehan nune’e “O saber não ocupa lugar”  katak KP ne’e la okupa fatin hanesan ida aprende tiha mai iha ne’e, ida aprende mai tan iha ne’e, too iha ne’e fatin laiha ona ita labele tau tan ona ka la’e ne’e la okupa ida,” Tenik Xanana.

Líder Nasionál ne’e hakarak, foin sa’ e sira ne’ebé assosia-an iha Organização Juventude Partidu – OJP, hodi kontribui ba revizaun ba Planu Estratéjiku Dezenvolvimentu Nasionál.

 “Buka aprende nafatin, aprende nafatin, buka hatene buat foun, tanba saidá maka iha Planu Estratejiku, agora komu paradu tiha ona tenke halo revijaun fali. Tanba planu estratejiku la’os foin koalia hadia nafatin. Ho ida ne’e hau koalia ho joven sira imi buka aprende, buka lê, buka akompañia mundu tanba imi la lé ne’e maka la komprende fó naroman ba povu,” Fundamenta Xanana Gusmão.

Tanba tuir Xanana, joven sira tenke preparadu hodi ezekuta dezenvolvimentu sustentável iha future, hodi hadi’a povu no nasaun nia moris.

“Sei imi hakarak dalan ba futuru maka imi, ita tomak, prespetiva juventude nian iha dalan ba futuru, futuru iha imi nia liman. Ba imi OJP feto ka mane imi tenke hanoin katak imi maka sai fator ba sustentabilidade ba partidu CNRT, imi foin dadauk,” Subli           ña antigu Xefe Governu ne’e.

OJP ALISERSE HUSI DEMOKRASIA

Parte seleuk, Prezidente Partidu CNRT, Kay Rala Xanana Gusmão husu ba membru organizasaun juventude Politika (OJP), atu tane a’as valor ba direitu demokrasia, bazeia ba prinsípiu Partidu CNRT nian.

Pedidu husi líder nasionál ne’e relasiona ho violasaun ba trámite no normas legal husi ukun atuál, hodi halo estabilidade órgaun soberanu sira prejudikadu, inklui valores husi estadu direitu demokrátiku.

“Kuandu lolos esforsu sira, ne’e ita hala’o dadauk no ohin loron ita temi rekonstrusaun ba estadu ne’e, katak ita hatene ona estadu iha ai-rin hat tenke rekonstroi tenke hadi’a. Iha tinan 2018 ita hare lafaek ida iha sorin (rival polítika), haré ita mai hamutuk ba ita hatun tiha lafaek, mais ita la hatene katak ita la hatene nani hanesan lafaek” argumenta ho implísitu, evolusaun polítika ne’ebé akontese dezde tinan 2023.

CNRT LUTA BA KADEIRA 33

Relasiona ho konstelasaun polítika ba tinan 2023, Sekretáriu Jerál Partidu Congresso Nasionál Recontrução Timorense (CNRT), Fransisco Calboadi Lay dezafia membru Organizasaun Juventude Politika (OJP) sira aservisu makaas atu hetan kadeira 33 ba iha eleisaun parlamentár.

“Primeiru, asegura uluk maioria absoluta, mínimu kadeira 33 ha’u hatene sei  aumenta liu ida ne’e, konta ho esforsu OJP sira ne’e, ha’u loke odamatan, hein sira atu mai, ha’u hakru’uk ba sira, hodi selebra vitoria ida ne’e,” Hateten Kalbuady Lay,

Tuir sekretáriu jeral CNRT, ekipa monitor sei akompaña ho rigor prosesu eleitorál tomak, hodi evita erru no garante kredibilidade husi rezultadu eleisaun parlamentár.

 “Agora hau husu fali ba imi hotu, imi prontu ka la’e? Sei prontu organizasaun tolu ne’e hamutuk ho CDN, CPN sira, liu-liu juventude sira. Imi tenke sai matan dalan iha oin kedas iha eleisaun parlamentár mai, atu segura vitoria ida ne’e,” Tenik.(smnews)