Presiza PR ho Vizaun Luan no Solusaun ba Problema, CNRT Sei la Apoio Kandidatu Husi Partido Seluk

Smnewstl.com 24-11-2021 (Dili) – Presidente Republika hanesan airin dahuluk ne’ebe tenki kumprimenta deit Kostituisaun da Republika Democratika Timor Leste hodi salva guarda interese estado.

Liga ba situasaun atual no falta deit ona fulan balun nia laran povu ne’ebe nudar nain ba estado sei deside hikas nia presidente foun ba futuru rai ne’e hahu ona sai diskusaun maka’as iha sosiedade kona ba kandidatu timoroan potensial sira maske naran balun hahu harame ona media social facebook.

Akademista Flarinando Coimbra prefere timoroan ne’ebe avansa ba Presidente Republika tenki iha vizaun no hatur a’as konstituisaun nudar mata dalan hodi dignifika estado ida ne’ebe forte no metin.

“Ha’u hanoin hanesan ne’e, Prezidente Republika ida mai agora tenki ho figura ida ne’ebe bele reformula situasuan polítika katak, mai ho integridade no restaura fali konfiansa povu desde 2017 to’o agora.

Eis Komandante Brigada Negra ne’e haktuir, restaura situasaun politika katak presiza Prezidente ida ké brani atu dekreta katak, prosesu sira husi 2017 mai to’o agora ne’e sala.

“Tenki rekuinese ba formasaun oitavu governu ne’e, prosesu ida ké naksalak duni, ita tenki rekuiñse ida-ne’e, no Prezidente foun tenki iha kbiit konstitusionál atu reformula meza Parlamentu Nasionál ne’e katak, produtu meza Parlamentu Nasionál iha buat balun ké la tuir dalan,”tenik nia.

Nia hatutan, solusaun ba situasaun sira ne’e hotu maka presiza duni figura ida ké iha vizaun dok no tenki iha kuiñesimentu kle’an bá implementasaun konstitusionál nasaun ne’e. Laos naran ba foti deit Prezidete Republika ida, ne’e lae.

“Prezidente ne’e tenki konsientemente iha korajen atu hatete sai katak, 2017 mai to’o 2021 ne’e, iha duni naksalak konstitusionál iha duni buat balun la’o la tuir konstituisaun hateten. Se’e Prezidente ne’e bele garante pensamentu ida-ne’e, ha’u hanoin bele lori páz, trankuilidade no halo Timor-Leste avansa bá oin, tanba garante harmonizasaun órgaun estadu,”nia fundanenta

Flarinando sublinha tan, Prezidente Republika refleta de’it saida mak konstituisaun hateten, sé konstituisaun dehan, harmonizasaum órgaun estadu tenki la’o tuir nia regra konstitusionál, Prezidente labele ses aan husi ida-ne’e. Tamba, ho ne’e deit maka bele restaura konfiansa povu atu estadu ou governu ne’e bele implementa nia servisi diaria ho diak.

“Sé Prezidente ses husi konstituisaun Repúblika ne’e susar ona ba governu atu ezekuta mandatu tinan 5 tuir povu nia hakarak.

“Povu hotu akompaña prosesu husi 2017 mai, rezultadu meza redonda, ninia implemetasaun laloos, rezultadu meza redonda ne’e oinsá ita rasik la komprende, tanba ne’e mak ha’u hakarak Prezidente ne’e tenki firmeza iha defende konstituisaun Repúblika ne’e,”afirma Coimbra

Enkuanto kona ba pozisaun Partido CNRT ligado ho publikasaun iha media sira kona ba deklarasaun Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur ne’ebe deklara hein bensaun husi Kay Rala Xanana Gusmao hodi kompete ba Kandidatu Presidente, fonte internal husi lideransa CNRT nian afirma kedas katak, iha kandidatu rasik no sei deside liu husi konferensia.

“CNRT iha kandidatu rasik, hein konferensia maka sei deside, satan apoio ema ne’ebe mai husi partido seluk,”Afirma ho lian maka’as fontes internal husi Partido CNRT nee.

Dadaun ne’e, naran hirak ne’ebe hahu harame media social facebook mak hanesan Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur, Armanda Berta dos Santos atual Presidente Khunto, Antonio Benevides, Deputado PUDD, Virgilio Guterres, Presidente Konselho Imprensa no seluk tan maske to’o oras ne’e partido politiku bo’ot rua hanesan Fretilin no CNRT seidauk anunsia sira nia kandidatu. (Rio)