Preparado Realiza Eleisaun, CNE Rekruta Ona Ofisiál 1.500 Destaka Iha Sentru Votasaun ho Estasaun Votu

Smnewstl.com 22-01-2022 (Dili) — Komisaun Nasionál Eleisoens (CNE) rekruta ona ofisiais hamutuk 1.500 resin ne’ebé sei destaka bá iha sentru votasaun ho estasaun votu iha Timor-Leste inklui diáspora.

Prezidente CNE, José Belo hateten, ofisiais sira-ne’e, CNE rekruta ona tuir nesessidade CNE nian, tanba ne’e, tempu badak CNE fó formasaun bá sira molok destaka bá sentru votasaun ho estasaun votu sira.

“Ita-nia preparativu másimu ona desde pre-eleitorál to’o agora, ne’ebé ita agora daduak ko’alia hela oinsá par atu bele halo treinamentu bá ita-nia ofisiál sira, sira halo hela servisu hirak ne’e atu bele hatene liután evaluasaun situasuan uluk ne’e,” dehan Prezidente CNE, José Belo, iha salaun Leokase Raikotu Comoro, Dili, Sábdu ne’e.

Husi ofisiais 1.500 resin ne’e, na’in 1.200 mak sei koloka bá iha sentru votasaun ho estasaun votu sira iha Timor laran tomak.

“Ita rekruta tanba tuir ita-nia nesessidade liu-liu ita iha 1.500 itál, 1.200 bá sentru votasaun depois bá estasaun de votus sira, formasaun seidauk la’o, tanba rekrutamentu foin hotu, agora ita haree para semana oin atu bele iha ona formasaun,” subliña nia.

Entretantu, kona-ba diáspora nian, José Belo afirma, CNE sei haree oinsá atu koloka ofisiais sira bá estranjeiru, tanba eleisaun prezidensiál ne’e sei realiza iha estranjeiru.

Sei Kesi Kandidatu PR ho Paktu Unidade Nasionál Molok Kampaña

Husi seluk seluk, Komisaun Nasionál Eleisoens (CNE) mos sei konvida kandidatu Prezidente Repúblika (PR) sira hodi asina paktu unidade nasionál hanesan símbolu nu’udar Timoroan atu labele ataka malu durante kampaña eleisaun prezidensiál.

Prezidente CNE, José Belo hateten, CNE sei halo supervizaun másimu iha kampaña eleisaun prezidensiál.

José Belo hatutan, kandidatu sira sei aprezenta sira-nia kalendáriu kampaña bá CNE hodi halo reajustamentu atu labele soke malu iha terenu, nune’e bele garante páz no establidade durante kampaña.

“Tanba ne’e mak ami mós sei haree hela par iha paktu ruma ne’ebé bele kesi mós ita-nia kandidatu sira hanesan ema kultura timoroan ne’ebé diferente ho rai seluk, alem de lei sira-ne’ebé iha, sira mós tenki iha komprensaun bá malu, liafuan sira ne’ebé ladún kontribui bá ita-nia estadu di’ak liu ita evita, atu nune’e kampaña la’o di’ak, sé mak sai prezidente, prezidente bá timoroan duni,” dehan Prezidente CNE, José Belo.

Asinatura Paktu Unidade Nasionál ne’e importante tebes bá kandidatu sira, atu nune’e sira labele insulta malu iha kampaña, tanba kandidatu ne’ebé mak eleitu sei sai Prezidente Repúblika bá timoroan hotu.

“Sim paktu unidade nasionál, tanba prezidente bá territóriu tomak, timoroan hotu-hotu partisipa, tanba ne’e mak líder sira iha komitmentu, líder sira kuandu hamutuk hanoin ne’e ida de’it, sira la ataka malu situasuan bele di’ak, ema hotu fó sira-nia votus,” esplika José Belo.

Paktu unidade nasionál ne’e, CNE sei halo molok tama bá iha kampaña eleisaun prezidensiál, ne’ebé sei involve entidade hanesan, ekipa susesu husi kandidatu sira, veteranus, igreja katólika, akadémiku no seluk tan.

Entretantu, kandidatu ne’ebé deklara ona bá públiku atu kandidatu iha eleisaun prezidensiál mak atuál Prezidente Repúblika (PR), Francisco Guterres Lú-olo, Tenente Jenerál Lere Anan Timur, Vise Primeira-Ministra, Armanda Berta dos Santos, Constâncio da Conceição Pinto, Milena Pires.

Nune’e mós, atuál Prezidente Konsellu Imprensa, Virgílio Guterres ‘Lamukan’, Padre Dispensadu, Martinho Gusmão. (Ant)