PR Lú-olo Promulga Ona Alterasaun Lei Eleitorál Bá Eleisaun Prezidensial ho Alterasaun LOAE Dala-3

Smnewstl.com (Dili) — Prezidente Repúblika (PR), Francisco Guterres Lú-olo, promulga ona alterasaun lei dala-6 bá Eleisaun Prezidensiál (Elpre) no mós alterasaun Lei Organizasaun Administrasaun Eleitorál (LOAE) dala-3.

Xefe Estadu, Francisco Guterres Lú-olo hateten, nia sente ksolok tebes bainhira promulga lejislasaun sira kona-ba organizasaun no prosesu eleitorál tomak ne’ebé prepara husi Parlamentu Nasionál (PN) ho kolaborasaun husi governu.

“Kona-ba lejislasaun nesessária bá eleisaun sira tuir mai, Prezidente Repúblika promulga ona alterasaun dala 6 bá lei eleitorál bá Prezidente Repúblika ho alterasaun dala tolu bá órgauns administrasaun eleitorál,” dehan Xefe Estadu, Francisco Guterres Lú-olo, iha diskursu hafoin abertura semináriu nasionál kinta (12/08/21) iha CNE.

PR Lú-olo afirma, alterasaun lei dahuluk kona-ba resenseamentu eleitorál, oras ne’e dadauk, PN sei hadi’a hela, tanba ne’e, tempu badak sei haruka bá PR atu promulga.

“Lei ordinária sira tenki bazeia bá konstituisaun RDTL, hotu-hotu hamutuk mak sai matadalan no instrumentu jurídiku bá CNE no STAE, órgaun sira-ne’ebé halo parte mákina estadu ho ida-idak nia lideransa no funsionamentu rasik, maibé servisu hamutuk hodi tau matan bá organizasaun prosesu eleitorál atu hetan susesu boot,” subliña Lú-olo.

Tanba ne’e, CNE ho STAE mak sei tetu hamutuk kona-ba eleisaun sira-ne’ebé hala’o ona bá Prezidente Repúblika no PN, nune’e bele prepara di’ak liután bá aktu eleitorál ne’ebé previstu iha eleisaun prezidensiál tinan 2022 no eleisaun parlamentár tinan 2023.(ant)