PR Lú-olo Husu CNE ho Parpol Intensifika Edukasaun Sívika Bá Sidadaun

Smnewstl.com (Dili) — Prezidente Repúblika (PR), Francisco Guterres Lú-olo, husu Komisaun Nasionál Eleisoens (CNE) ho Partidu Polítiku (Parpol) sira atu intensifika liután edukasaun sívika bá sidadaun sira.

Nune’e, bele eduka sidadaun sira, bainhira tempu eleisaun, sidadaun sira bele hili partidu ne’ebé mak iha programa no estatutu di’ak, maibé la’ós hili fali figura partidu nian.

“Tanba ne’e CNE partidu polítiku no organizasaun sosiedade sivil sira halo edukasaun sívika kona-ba prosesu eleitorál, edukasaun sívika ida-ne’ebé tenki fó hanoin bá sidadaun sira atu hili partidu sira ne’ebé iha programa no estatutu di’ak, la’ós haree de’it bá líder ka personalidade ruma iha partidu polítiku,” dehan PR Lú-olo, iha diskursu hafoin halo abertura bá workshop nasionál iha CNE, Dili. Kinta (12/08/21).

Xefe Estadu ne’e hatutan, programa partidu nian mak hatudu prinsípiu ho valores inklui líder partidu sira-nian atu hametin estadu direitu demokrátiku no lori dezenvolvimentu bá ne’ebé fó benefísiu efetivu bá povu tomak.

“Ita hotu hanesan sidadaun, Timor-Leste presiza iha konsiénsia kle’an katak, demokrasia la’ós de’it fó biban bá povu vota iha eleisaun bá Prezidente Repúblika no eleisaun bá lejislativa hodi partidu sira manán asentu parlamentár no ka’er governasaun bá ita-nia rain, nune’e kompromísiu eleitorál mak sai sasukat bá ukun-na’in sira-ne’ebé povu hili,” afirma Lú-olo.

Prezidente Repúblika elojia, tanba demokrasia Timor-Leste nian hetan ona rekoñesimentu nasionál no internasionál, maibé presiza hala’o no lori bá oin hodi lori moris di’ak bá povu.

Maibé, Xefe Estadu mós husu bá orgaun administrasaun eleitorál no partidu polítiku sira, atu konsidera mós ema ho difisiensia sira hodi partisipa iha eleisaun prezidensiál no parlamentár iha tinan sira oin mai.

“Ha’u hakarak husu bá imi hotu haree mós bá direitu maluk difisiente sira-nian, atu vota iha eleisaun prezidensiál no parlamentár, konstituisaun rekoñese direitu ema ne’e, no hateten katak, estadu iha dever tuir nia posibilidade atu promove liu husi lei, protesaun bá ezersísiu direitu atu vota husi maluk difisiente sira,” apela PR Lú-olo.(ant)