PR Lú-olo Hakarak Hasa’e Taxa Partisipasaun Sidadaun Iha Eleisaun

Smnewstl.com (Dili) — Prezidente Repúblika (PR), Francisco Guterres Lú-olo fi’ar katak, liu husi workshop nasionál ne’ebé promove husi Komisaun Nasionál Eleisoens (CNE) hamutuk ho organizasaun partidu polítiku sira, sei identifika aspetu hotu hodi garante partisipasaun sidadaun sira-nian iha eleisaun.

Xefe Estadu hato’o lia hirak ne’e, hafoin loke workshop nasionál ho tema “Evolução da democracia em Timor-Leste” ne’ebé realiza husi Komisaun Nasionál Eleisoens (CNE), kinta (12/08/21).

“Bá CNE no STAE no mós bá ekipa organizasaun no partisipante sira iha workshop nasionál ida-ne’e, ha’u fi’ar katak, ita-boot sira sei identifika aspetu pozitivu no negativu liu husi esperiénsia uluk, atu halibur lisaun di’ak hodi hasa’e partisipasaun povu nian iha eleisaun tuir mai no garante katak, sei la’o ho ambiente hakmatek lívre, demokrátiku no justu,” dehan PR Lú-olo.

Xefe Estadu konsidera, tema bá semináriu nasionál ne’ebé CNE foti, relevante duni ho realidade sosiál no polítika oras dadauk.

“Evolução da democracia em Timor-Leste, depende da evolução do pensamento sobre realidade ida-ne’ebé mak ita-nia matan haree ita-nia tilun rona, bainhira ita koñese realidade ida-ne’e, ita forma ita-nia juizu demokrátiku ida kona-ba própriu realidade ida atu halo mudansa la’o bá oin,” subliña PR Lú-olo.

Bá Lú-olo, eleisaun atu hili ukun-na’in sira hodi bá tur iha órgaun soberania sira atu serví povu, maibé la’ós de’it hetan lejitimidade demokrátika par ukun.

Ne’eduni, bá partidu no líder ne’ebé hetan fi’ar husi povu, tenki fó resposta loloos bá saida mak povu hakarak.

“Tanba ne’e hamutuk ho konstituisaun RDTL nu’udar ita-nia matadalan prinsipál ita hakiak no haburas ita-nia paíz demokrasia páz no estabilidade hasa’e moris di’ak bá ita-nia povu,” tenik nia.

Entretantu, Xefe Estadu dejafia órgaun eleitorál rua CNE ho STAE no instituisaun relevante atu servisu makas liután liu-liu relasiona ho prosesu resenseamentu eleitorál bá sidadaun sira, nune’e sira bele vota eleisaun prezidensiál tinan 2022.

Oradór sira ba semináriu nasionál ne’e mak, Sekretáriu Jerál partidu FRETILIN, Marí Alkatiri, Eis Prezidente Repúblika, José Ramos-Horta, Bispu Dioseze Baucau, Dom Basílio do Nascimento, no seluk tan.

Partisipante iha semináriu ne’e kompostu husi reprezentante partidu polítiku sira, sosiedade sivil no mós akadémiku sira.(ant)