Postu 4 Iha Aileu Reforsa Lori Antonio ba Tu’ur Iha Aitarak Laran

Smnewstl.com (Aileu) — Reprezentante husi postu administrativu 4 iha munisípiu Aileu, deklara sei fó apoiu tomak bá atuál Deputadu bankada PUDD, António de Sá Benevides atu kandidata bá Prezidente Repúblika (PR) periódu tinan 2022 to’o 2027.

Koordenadór Ekipa Susesu, Jacinto Mendonça afirma, sira hakarak apoiu atuál Deputadu PUDD, António de Sá Benevides, nu’udar kandidatu independente bá PR periódu tinan 2022 to’o 2027.

“Ami hotu ne’ebé halibur aan iha ne’e, reprezenta postu Aileu Aileu Villa, Laulara, Remexio no Liquidoe, hodi deklara bá públiku katak, ami hakarak Kandidata ami-nia kandidatu independente, ami-nia oan, ami-nia maun no alin Deputadu António Benevides bá Prezidente Repúblika tinan 2022-2027,” deklara Jacinto Mendonça, sábdu (14/08/21) iha komferénsia imprensa, iha aldeia Aitohu-Laran, suku Aisirimou, postu Aileu Villa munisípiu Aileu.

Jacinto esplika, rajaun sira hakarak Kandidata António Benevides bá PR, tanba António Benevides hanesan joven jerasaun foun no joven kontinuadór ne’ebé iha kapasidade no merese duni atu sai PR.

“Rajaun simples ne’ebé ami deklara atu apoiu maun Deputadu António Benevides, hanesan ema jerasaun foun, hanesan ema kontinuadór, ami ho fuan ho laran atu apoiu nia kandidatu bá Prezidente Repúblika,” dehan nia.

Nia afirma tan, sira sei halo esforsu no mobiliza inan-aman sira atu vota bá Kandidatu independente António Benevides hodi hetan vitória iha eleisaun prezidensiál tinan oin.

“Ami-nia esforsu sira, ami sei mobiliza ami-nia joven sira, inan-aman sira, husi knua, suku, aldeia, iha ne’ebé de’it ami sei bá to’o atu husu sira-nia apoiu bá ami-nia maun Deputadu António de Sá Benevides, hanesan ema ami sei garante katak, ami sei hetan susesu, ami Aileu oan prontu fó enerjia tomak bá servisu bá susesu maun Deputadu, António Benevides,” subliña nia.

Nia realsa, deputadu António de Sá Benevides nu’udar Aileu, Maubisse no Manufahi oan merese hetan oportunidade atu kandidata aan bá Prezidente Repúblika.

Antes ne’e mós, Konsellu Juventude Nasionalista Timorense (KNJT), deklara, sei fó apoiu tomak bá atuál Xefe Bankada PUDD, António Benevides, atu kandidata bá PR.(ant)