Posibilidade, Semana Oin Governu Hakotu Serka Sanitáriu Iha Dili

Smnewstl.com 23-09-2021 (Dili) – Diretór Sala Situasaun Sentru Integradu Jestaun Krize (SIJK), Brigadeiru Jenerál João Miranda ‘Aluk’ informa, posibilidade reuniaun konsellu ministru iha kuarta-feira semana oin, governu hakotu ona impozisaun serka sanitáriu iha munisípiu Dili.

Iha Kinta-feira ohin, Brigadeiru Jenerál ‘Aluk’, atualiza bá Primeiru-Ministru, Taur Matan Ruak, ne’ebé hanesan mós komandante operasionál bá Sala Situasaun SIJK, kona-ba situasaun jerál Covid-19 iha Timor-Leste.

Brigadeiru Jenerál ne’e informa, maske Sala Situasaun SIJK halo ona aprezentasaun iha konsellu ministru iha kuarta-feira (22-09-21) liu bá, iha ne’ebé, konsellu ministru deside extende tan impozisaun serka sanitaria iha kapitál Dili, hodi limita sirkulasaun ema nian husi Dili bá munisípiu seluk.

Maibé haree bá evolusaun pandemia Covid-19 iha Timor-Leste ne’ebé hahú iha mudansa, tanba ne’e, provavelmente governu sei levanta fila-fali impozisaun serka sanitaria refere.

“Situasaun jerál iha ita-nia rai laran liu-liu kona-ba moras Covid-19 ninia situasaun ne’e ita bele dehan katak, komesa di’ak oituan. Ohin ami na’in-rua ko’alia hela, provavelmente próximu konsellu ministru, sé situasaun ida-ne’e mantein ho nível ida agora, husi konsellu ministru bele desedi halo levantamentu bá medidas serka sanitaria iha capital Dili,” dehan Brigadeiru Jenerál Aluk, hafoin remata enkontru ho PM Taur iha Palásiu Governu.

Aluk informa, servisu sala situasaun SIJK nian durante ne’e la’o di’ak tebes, tanba papel importante SIJK nian mak atu ajuda ministériu saúde hodi bele implementa medidas protokolu Covid-19 nian.

Durante implementasaun medidas hirak ne’e, Aluk dehan, iha ema barak mak lamenta, tanba aplikasaun regras refere nia durasaun tempu ne’ebé naruk tebes no halo sira laiha ona vontade atu kumpre.

“Ami koopera atu ministériu saúde kona-ba implementasaun medidas sira, iha balun ne’ebé la’o di’ak, iha balun ne’ebé imi hatene, por mais que ita insiste, ita-nia maluk ne’ebé ho satuasaun ho tempu ne’ebé mak naruk liu lakon tiha ona pasiénsia. Mais husi sala situasaun SIJK, ami la lakon vontade ami sempre tenta apoia nafatin par ita kumpre regras sira-ne’ebé prokolarmente ministériu saúde estabelese par ita bele hadok aan husi moras aat ne’e,” dehan nia.

Alemde ne’e, konsellu ministru mós aprova projetu rezolusaun governu nian ne’ebé mantein impozisaun serka sanitária iha munisípiu Dili to’o tuku 23:59 loron 29 fulan-setembru tinan 2021.(ant