Posibilidade, 14 Setembru Ekipa Tékniku Desloka Bá Diáspora Halo Resenseamentu Eleitorál

Smnewstl.com 01-09-2021 (Dili) — Posibilidade loron 14 fulan Setembru tinan ida-ne’e, ekipa tékniku sira sei desloka bá diáspora hodi hahú halo resenseamentu eleitorál no mós atualizasaun baze de dadus timoroan sira iha estranjeiru.

Instituisaun 4 ne’e kompostu husi Sekretariadu Tékniku Administrasaun Eleitorál (STAE), Komisaun Nasionál Eleisoens (CNE), Ministériu Negósiu Estranjeiru no Koperasaun (MNEK) no Ministériu Justisa, liu husi Diresaun Naisonál Rejístu Notariádu (DNRN).

Diretór Jerál STAE, Acilino Manuel Branco hateten, governu aprova ona rezolusaun governu hodi fixa fatin atendimentu no mós kalendáriu realizasaun resenseamentu eleitorál iha rai li’ur.

Nune’e, resenseamentu eleitorál iha li’ur ne’e kalendáriu hahú iha loron 1 fulan setembru tinan 2021 to’o loron 15 fulan Janeiru tinan 2022, maibé la konsege ekipa tékniku labele desloka bá rai li’ur, tanba aplikasaun konfinamentu obrigatóriu, iha ne’ebé laiha voo aviaun.

Nune’e mós, presiza halo fali ajustamentu, tanba governu deside resenseamentu eleitorál tinan ida-ne’e, presiza involve tan Ministériu Justisa liu-liu Servisu Rejístu Notariádu, nune’e bele sertifika sidadaun sira.

“Entaun ita ajusta fila-fali preparasaun ho parte sira-ne’e hotu, maibé tuir loloos ekipa sira desloka ona, maibé ita-nia dezafiu ida mak tanba ita iha hela serka sanitária lockdown iha ita-nia rain liu-liu bá aviaun sira-nia oráriu atu semo tama no sai husi ita-nia paíz, entaun ikus mai ita adi’a ita-nia tempu bá deslokasaun ninian hodi la’o tuir oráriu ne’ebé kompañia aereo sira fasilita ita-nia voo sira husi Dili bá paíz refere, tanba sira la’ós semo normál hanesan tempu uluk,” informa Diretór Acilino Manuel Branco, iha knár fatin STAE, kinta ohin.

STAE mós komunika ona ho ajénsia aviasaun sira, no tuir planu ekipa tékniku sira sei desloka bá estranjeiru iha dia 14 fulan Setembru tinan 2021, bainhira laiha impedimentu ruma.

“Tuir kontaktu ne’ebé mak halo ho ajénsia sira, pode ser iha dia 14 sira-ne’e iha aviaun, entaun ita-nia sé no kazu laiha impedimentu bá to’o iha dia 14, ha’u hanoin ne’e ekipa bele aranka ona, mais agora depende bá disponibilidade husi ajénsia aviaun sira-ne’e mai ga la’e, tanba ne’e mak iha ona preparasaun téknika husi parte 4 STAE, CNE Ministériu Negósiu Estranjeiru ho Ministériu Justisa liu-liu servisu notariádu ekipa sira preparadu hotu ona,” subliña nia.

Acilino Manuel Branco subliña, prezensa tékniku STAE nian iha li’ur sei la kleur, tanba STAE atu bá instala de’it sistema husi estrajeiru bá sistema sentrál STAE nian, fó formasaun bá funsionáriu diplomata sira, inklui fó esklaresimentu balun bá komunidade timoroan sira iha li’ur.

Entretantu, nasaun ha’at ne’ebé sekioa tékniku sira atu bá halo resenseamentu eleitorál mak hanesan, Austrália, Korea Postugál no Reino Unidu (Inglaterra).

Dadus provizóriu sidadaun sira li’ur hamutuk 6000 resin, maibé, husi 6000 ne’e bele menus ona, tanba balun muda ona sira-nia kartaun eleitorál iha Timor-Leste, tanba sidadaun balun bá ho motivu servisu, balun eskola no seluk tan.(ant)