PN Autoriza PR Lú-olo Renova Estadu Emerjénsia Bá Loron 30 Tan

Smnewstl.com — Parlamentu Nasionál (PN) aprova ona rezolusaun n°.78/2021 hodi autoriza Prezidente Repúblika (PR) Francisco Guterres Lú-olo atu dekreta renovasaun deklarasaun estadu emerjénsia bá loron 30 tan hahú iha dia 1 oras 00:00 to’o loron 30 fulan-augustu tinan 2021 oras 23:59.

Rezolusaun ne’e PN aprova iha plenária extra-ordináriu komisaun permanente, no deputadu sira halo votasaun nominál ho votus a-favór 18, kontra zero no abstensaun 13.

“Rezultadu votasaun a-favór 18, kontra zero abstensaun 13, nune’e rezolusaun n°.78/2021 autorizasaun renovasaun deklarasaun estadu emerjénsia pasa,” informa Prezidente PN, Aniceto Guterres, liu husi plenária extra-ordináriu Tersa (27/07/21) iha PN.

Aniceto Guterres esplika, maske PN aprova ona rezolusaun ne’e, maibé deputadu komisaun permanente sira presiza halo deliberasaun liu husi plenária, nune’e bele konfirma fila-fali desizaun refere.

“Tuir lei apezar de rezolusaun ne’e pasa, Prezidente Repúblika autorizadu par renova estadu emerjénsia, maibé tuir lei sobre rejime estadu de sítiu estadu emerjénsia lei n°.3/2018 artigu 11 númeru 2 komisaun permanente PN a declaração do estado de sítio ou do estado de emergência é confirmar pelo plenário logo que seja possível reunião,” esplika Aniceto.

“Entaun plenária PN tenki konfirma deliberasaun ga desizaun ida ohin autoriza Prezidente Repúblika atu deklara renova estadu emerjénsia,” nia subliña tan.

Nune’e mós, deputadu sira deside loron 10 fulan-augustu tinan 2021, atu halo konfirmasaun bá rezolusaun renovasaun deklarasaun estadu emerjénsia ne’e.

“Rezultadu votasaun a-favór 29 kontra zero abstensaun 2, tanba ne’e meza anunsia kedas komisaun permanente konvoka plenáriu extra-ordináriu bá konfirmasaun autorizasaun estadu emerjénsia Tersa-feira dia 10 de Agostu,” informa Aniceto.

Sorin seluk, Deputadu bankada KHUNTO, António Verdial hateten, nia vota a-favór, maibé husu governu atu selu pagamentu bá kompañia distribuisaun pakote cesta bázika.

“Husu bá governu atu selu deve sira-ne’ebé mak kompañia sira hasai tiha ona hodi atende bá cesta bázika, husu governu atu servisu integradu nafatin mantein pozisaun hodi trata ita-nia povu ne’e ho dignu,” afirma António Verdial.

Fatin hanesan, Deputada bankada CNRT, Bendita Magno lamenta tanba, governu la responde bá sira-nia preukupasaun ne’ebé sira husu ezekutivu atu halo pagamentu ona bá ekipa liña frente sira.

“Ha’u lamenta teb-tebes ho governu defaktu ida-ne’e la hatán ami-nia preukupasaun aselera pagamentu bá ita-nia front line sira, PNTL, F-FDTL no mós pessoál saúde husi doutores sira to’o bá saúde públika, bombeirus, seguransa sivil no mós sira seluk ne’ebé servisu iha front line,” kestiona Bendita Magno.

Nune’e mós, Vise Prezidente PN, deputadu Luis Roberto da Silva, husu Ministériu saúde atu distribui aimoruk vasina bá sentru saúde sira halo barak, nune’e bele atende populasaun sira.(ant)