PN Aprova Orsamentu Bá Gabinete PM ho Redusaun 125%

Smnewtl.com 06-12-2021 (Dili) – Parlamentu Nasionál (PN) aprova orsamentu Gabinete Primeiru-Ministru (PM) iha Orsamentu Jerál Estadu (OJE) bá tinan 2022 aprova iha espesialidade ho votus afavór 39 kontra 2 no abstensaun 17.

Orsamentu Gabinete PM aprovadu, tanba laiha proposta ne’ebé deptadu sira hato’o hodi husu atu halo alterasaun bá verba ruma iha orsamentu ne’ebé aloka bá iha Gabinete PM.

Orsamentu Gabinete Primeiru-Ministru hamutuk 4.915.494 ne’ebé aloka bá kategoria saláriu vensimentu $16.733, bens servisu $ 3.246.761, transferénsia públika $ 750.000, kapitál menór $ 150.000 no kapitál dezenvolvimentu 252.000.

Nune’e, orsamentu bá Gabinete PM ne’e, sei finansia bá programa importante sira iha tinan 2022 mak hanesan aloka bá programa 366 seguransa nasionál ho total $60 mill, programa 501 boa-governasaun no jestaun institusionál $ 4.855.494.

Maibé, Deputada bankada CNRT, Virgina Ana Belo lamenta ho orsamentu Gabinete PM ne’ebé hetan redusaun hamutuk 125%, tanba redukasaun ne’e boot liu fali Ministériu ho ajénsia autónoma sira, tan ne’e sei afeta bá programa Gabinete PM nian.

“Ha’u hakarak husu de’it bá señór Primeiru-Ministru, ita-boot sakrifika programa saida iha ne’e mak depois sai ita-boot nia osan dimuinui ida hanesan ne’e.? Labele husik hela ita-boot nia Gabinete osan ida ké ita haree hanesan sei la korresponde bá servisu saida mak ita-boot halo,” lamenta Deputada Virgina Ana Belo, iha debate espesialidade iha plenária, segunda-feira ne’e.

Nune’e mós, Deputadu bankada Partidu Libertasaun Populár (PLP), Françisco Vasconselos reforsa, bainhira Komisaun A halo audiénsia públika ho Xefe Gabinete PM nian, deputadu sira mós preukupa ho redusaun iha orsamentu Gabinete PM nian, tanba redusaun ne’e boot tebes.

Maibé Vasconselos dehan, orsamentu Gabinete PM sofre redusaun makas, tanba Gabinete Apoiu Sosiedade Sivíl ho TIC TIMOR ne’ebé antes ne’e tutela direta bá PM, agora transforma ona bá Ajénsia Autónoma Finanseira.

“Pur-ezemplu iha sosiedade sivíl, nia tenki bá ona iha instituisaun autónoma finanseiru, depois TIC TMOR sai husi Gabinete PM, ne’ebé ajénsia sira ki’ik-oan ne’e mós ses husi Gabinete PM, tanba ne’e mak nia implikasoens katak, orsamentu Gabinete PM iha redusaun ida ké boot hanesan ne’e,” dehan nia.

Entretantu, Parlamentu Nasionál mós aprova orsamentu bá Ministériu Prezidénsia Konsellu Ministru, ho votus afavór 41, kontra 4 no abstensaun 16.

Total orsamentu ne’ebé aloka bá iha Ministériu Prezidénsia Konsellu Ministru, bá tinan 2022 hamutuk $ 4.717,347, ne’ebé aloka bá kategoria hanesan saláriu vensimentu hamutuk $ 551,540, bens servisu 4,165,807, enkuantu iha verba transferénsia públikas, kapitál menós no kapitál dezenvolvimentu zero.

Orsamentu hirak ne’e sei finansia bá programa sira hanesan, reforma estadu $ 405.188, boa-governasaun no jestaun institusionál $ 4,312,159.(ant)