PM Xanana: Konferénsia Internasional SIDS Oportunidade hodi Diskute Ajenda Dezenvolvimentu Tinan 10

Smnewstl.com ( Antinua no Barbuda) –  Ministru Negósius Estranjeirus no Kooperasaun (MNEK), Bendito dos Santos Freitas, akompaña Primeiru-Ministru, Kay Rala Xanana Gusmão, reprezenta estadu Timor-Leste partisipa iha Konferénsia Internasional kona-ba Small Island Developing States (SIDS) ba dala-4, iha Antigua no Barbuda.

Iha diskursu, Primeiru-Ministru, Kay Rala Xanana Gusmão afirma, dezafius Estadu Illa ki’ik nian sei barak, tanba ne’e, liu hosi konferénsia ne’e fó oportunidade atu ko’alia hamutuk iha li’an ida de’it hodi deside hamutuk ajenda dezenvolvimentu bá tinan 10 oin mai.

“Ita-nia prezensa iha-ne’e demonstra ita-nia kompromissu koletivu atu buka solusaun bá dezafiu sira ne’ebé Estadu illa kiik dezenvolvidu sira enfrenta. Ha’u fiar katak, hamutuk ita la’ós “kiik”. Hamutuk, ho vizaun ida no ambisaun ne’ebé partilla hamutuk, ita “Estadu boot sira Oseániku nian” ne’ebé servisu bá reziliente prosperidade ita-nia povu,” katak PM Xanana.

Iha tinan 25 lima liu bá, povu Timor-Leste hili independénsia hafoin periúdu lubuk ida hela iha okupasaun no kolonializmu. Desde ne’e, rezolve ona dezafiu sira lor-loron nian atu dezenvolve nasaun ne’ebé dame no demokrátiku, hosi tizolu sira funu nian.

“Ami hatene katak, ami la mesak iha ami-nia luta. Ita sai ida de’it hosi nasaun sira SIDS nian ne’ebé hasán hela tarrefa todan bá dezenvolvimentu sustentável. Ami servisu makaas atu dezenvolve ami-nia nasaun iha momentu sira difísil, nakonu ho dezafiu,” Xefe Governu sita tan.

Alende ne’e, PM Xanana Gusmão apela bá Estadu hotu-hotu atu bele kumpre sira-nia nia kompromissu bá apoia Estadu sira SIDS nian iha realizasaun dezenvolvimentu sustentável.

“Bá Estadu SIDS nian, oseanu nu’udár parte ida inseparável hosi ninia identidade. Timor-Leste dezenvolve hela polítika no planu asaun bá ekonomia azul, ho asaun konkreta atu bele rezolve poluisaun marina, konserva ambiemte tasi nian no biodiversidade, hodi dezenvolve ekonomia azul sustentável. Inisiativa sira-ne’e, presiza tebes servisu hamutuk no apoiu hosi amigu sira no mós parseiru ianternasionál sira. Apoiu ne’e presiza aliña ho prioridade nasionál sira,” Xefe Governu sita tan.

Xefe Governu, Kay Rala Xanana Gusmão konvida Estadu Illa Ki’ik sira hotu, atu hamutuk avansa no husik illa bonita Atinugua no Barbuda ho sentidu urjénsia ida no espíritu kooperasaun ida atu fó garantia bá kompromissu sira liu hosi asaun no prátika konkreta sira.

Entretantu, Konferénsia Internasional kona-ba SIDS4 ne’e, Xefe Governu, Kay Rala Xanan Gusmão no Ministru MNEK, Bendito dos Santos Freitas, hetan akompañamentu husi Reprezentante Missaun Timor-Leste ba Nasoens Unidas, Embaixadór Dionísio Babo Soares. (*/Smnews)