PM Xanana Agradese ba NGOZI OKONJO-IWEALA Simu Adezaun TL Sai Membro OMK

Smnewstl.com (SUIÇA) – Primeiru-Ministru Kay Rala Xanana Gusmão hato’o agradese ba esforsu hotu ne’ebé Word Trade Organization (WTO) ka Organizasaun Mundiál Komérsiu (OMK) hodi simu Timor-Leste hola parte sai membru OMK.

Xefe Governu Xanana hato’o apresiasaun ne’e durante hala’o enkontru ho Diretora Jerál Organizasaun Mundiál Komérsiu (OMK), Ngozi Okonjo-Iweala akompaña hosi Embaixadora no Reprezentante Permanente Misaun Timor-Leste nian iha Jenebra

Maria de Lurdes Martins de Sousa Bessa, antes partisipa Forum Ekonómiku Mundiál (World Economic Forum) bá dala-54 iha salaun enkontru Bilaterál, Davos-Klosters.

Governu Timor-Leste hala’o ona reuniaun Grupu Traballu dahitu hodi hatudu progresu iha loron 11 Janeiru 2024, marka pasu krusiál bá Timor-Leste antes Konferênsia Ministeriál OMK nian bá dala 13 (MC13) ne’ebé sei akontese iha loron 26 to’o 29 fevereiru 2024 iha Abu Dhabi, Emiradus Árabes Unidus, hodi simu pedidu Timor-Leste nian sai membru OMK.

“Ha’u hala’o mós ekontru ho Diretora Jerál WTO, senhora Ngozi Okonjo-Iweala nia elojia ita nia eforsu no ha’u mós agradese tebes ba ninia kontribuisaun dudu prosesu ita nia iha fevereiru (2024) agora iha Abu Dhabi bele asina ona akordu ita sai membru Organizasaun Mundiál Komérsiu,” PM Xanana agradese.

Iha fatin hanesan, Embaixadora no Reprezentante Permanente Misaun Timor-Leste nian iha Jenebra, Maria de Lurdes Martins de Sousa Bessa hato’o agradese tanba servisu ne’ebé nia parte hala’o kontinua lori Timor-Leste marka ona pasu signifikativu iha jornada integrasaun ekonómia globál ne’ebé konklui ona ho sussesu liu hosi Reuniaun Grupu Traballu dahitu hodi adere bá Organizasaun Mundiál Komérsiu (OMK).

“Grasa dedeus ho servisu ida boot tebe-tebes ho esforsu koletivu ida ho ita nia governu too ekipa tekniku sira hotu ho apoiu hosi WTO nia rasik ita konsege duni kompleta prodesu servisu para hodi konfirma ita nia adezaun ne’ebé marka ona ba loron 26 to’o 29 fevereiru 2024 iha Abu Dhabi, Emiradus Árabes Unidus, hodi simu pedidu Timor-Leste nian sai membru OMK,” tenik nia ho agradese.

Momentu importante ne’e nu’udár pasu krusiál iha jornada Timor-Leste nian hodi sai membru plenu ba organizasaun komersial globál ne’e.

Asuntu seluk tan ba servisu ne’ebé Embaixadora Lurdes Bessa hala’o maka reprezenta Timor-Leste iha Organizasaun Nasoes Unidas (ONU), Suiça no Monaco hodi servisu no koopera hamutuk ho organizasaun internasionál sira hodi luta ba kestaun direitu umanus nian.

“Servisu ne’ebé ita hala’o mezmu sede iha Jenebra, maibé ita fokus ba servisu iha Organizasaun Nasoes Unidas asuntu boot ida ne’ebé ita trata maka direitus umanus. Ita hatene katak, fofoun ita atu kandidata aan ba Membru Konsellu Direitus Umanusba tinan 2024-2026, maibé ita adia ba 2026-2029 ne’e para fó tempu ba ita prepara aan di’ak liután hodi prepara ita nia kandidatura ne’e,” nia informa.

Dadaun ne’e Embaixadora Lurdes ho diplomata feto Timoroan na’in-rua inklui sidadaun estranjerus ida maka hala’o servisu iha Jenebra hodi apoia servisu reprezentasaun Timor-Leste nian. (SMNews)