PM Taur; Taxa Vasinasaun Atinji 70%, Governu La Husu Ona EE

Smnewstl.com 24-08-2021 (Dili) — Primeiru-Ministru (PM), Taur Matan Ruak deklara, bainhira númeru taxa partisipasaun vasinasaun kontra Covid-19 mak atinji ona 70%, maka governu sei la husu tan Prezidente Repúblika (PR) no Parlamentu Nasionál (PN) atu extende tan Estadu Emerjénsia (EE).

Tanba Xefe Ezekutivu ne’e fó ona instrusaun bá membru governu sira atu tun bá baze halo kampaña sensibilizasaun kona-ba vasinasaun, nune’e sidadaun sira bele simu vasina, atu bele iha imunidade ne’ebé forte hodi rejiste hasoru Covid-19.

“Implementasaun estadu emerjénsia, ha’u fó instrusaun bá konsellu ministru katak, depois ita atinji 70% vasina, ha’u la mai tan husu estadu emerjénsia, ne’e ha’u-nia orientasaun bá ha’u-nia Ministru sira,” dehan Xefe Governu, Taur Matan Ruak, iha debate pedidu renovasaun deklarasaun estadu emerjénsia bá dala-17 iha plenária Parlamentu Nasionál Tersa ohin.

Komandante operasionál Sala Situasaun SIJK ne’e dehan, númeru persentajen vasinasaun, dadauk ne’e atinji ona 40%, tanba ne’e husu deputadu sira atu kontribui bá halo kampaña vasinasaun atu aselera prosesu vasinasaun bá populasaun sira.

Tanba PM Taur esplika, PN nu’udar segundu órgaun soberania ne’ebé poderozu tebes no povu fi’ar liu duké governu.

“Ita iha 40 itál ona, ami dudu makas Ministru sira barak halai tun sa’e, sira mesak la to’o tanba ne’e ha’u husu na’i deputadu sira-nia favór ida ita-boot sira-nia apoiu, sé ida-ne’e ita atinji 70% mínimu 80% másimu estadu emerjénsia la halo ona, ami husu na’i deputadu sira-nia apoiu, buat ida ami mesak ko’alia, buat seluk ne’e ita-boot sira-nia reforsa, ita-boot sira segundu órgaun soberania mais poderozu iha nasaun depois de Prezidente Repúblika, povu rona liu ita-boot sira duké ami governu,” Taur hatutan.

Alem de ne’e, Xefe Governu lakoi deputadu sira mós infetadu hotu bá vírus SARS-CoV-2, maibé hakarak hotu-hotu iha saúde ne’ebé saudável.

“Naturalmente ha’u ohin rona seriemente diskursu opozisaun nian, maibé ha’u husu par ita bele fó apoiu buat ne’ebé, tanba ha’u lakoi señór sira-ne’ebé ohin ko’alia ne’e ida mak bá mosu fali iha vera kruz, ha’u lakoi, ha’u hakarak ita hotu saudável, señór David (Mandati) bá tiha ona, fila-fali mai dehan la di’ak, iha Jesus nia tempu iha São Tomé, nunka fi’ar, no hakarak fi’ar koko tiha lai, entaun ha’u espera ké iha ne’e (PN) São Tomé la barak,” nia dehan tan.

Entretantu, dadauk ne’e, Timor-Leste simu ona apoiu vasina husi nasaun amigu sira hamutuk 982.380, no populasaun ne’ebé simu ona vasina iha doze dahuluk hamutuk 364.317, segunda doze 163.976 ki’ik 327.952, nia totál ita sei rezerva 270 itál mill.(ant)