PM Taur Pozitivo Kovid-19, Viagem Australia Adia

Smnewstl.com 08-02-2022 (Dili) – Primeiro Ministro, Taur Matan Ruak ho expoza ne’ebe planeadu vizita nasaun Australia iha Kuarta-feira ne’e labele realiza ho razaun rezultado teste SWAB pozitivu infetado Kovid-19.

Tuir karta komunikadu ne’ebe Smnews asesu iha pagina ofisial Facebook Primeiro Ministro Taur Matan Ruak, Tersa-feira lokoraik ne’e komfirma, pedidu adia vizita komunika ona ho Ministra Negósius Estranjeirus no Kooperasaun, Adaljiza Albertina Xavier Reis Magno atu komunika formalmente ba iha parte Governu Austrália nian, no sei ajenda fali ba tempu oportunu.

“Sua Eselénsia Primeiru-Ministru Taur Matan Ruak, Tersa ohin husu atu hato’o pedidu adi’a vizita ofisiál ba Austrália ne’ebé planeia ona ba Kuarta semana ne’e, ho razaun motivu saúde, tanba rezultadu teste SWAB iha loron 07 no loron 08 fulan-febereiru tinan 2022 ne’ebé fó sai iha tersa loraik ne’e, konfirma Xefe Governu ho nia espoza Dra. Isabel da Costa Ferreira, pozitivu SARS-COV-2,”haktuir nota komunikadu ne’ebe Smnews asesu.

Liu tan Nota Komunikadu ne’e fundamenta, maske pozitivu COVID-19, maibé Xefe Ezekutivu ho espoza iha kondisaun saúde di’ak hela, no tuir rekomendasaun médiku, Xefe Governu presija deskansa iha uma tuir protokolu saúde nian hodi hein teste tuir mai.

Enkuanto kona-ba pedidu adia vizita ne’e, tuir karta komunikadu ne’e dehan, Xefe Governu komunika ona ho Ministra Negósius Estranjeirus no Kooperasaun, Adaljiza Albertina Xavier Reis Magno atu komunika formalmente ba iha parte Governu Austrália nian, no sei ajenda fali ba tempu oportunu. (*/rio)