PM Taur; “Mandatu Hotu, Hakarak Tau Forsas Armadas Iha Fronteira”

Smnewstl, 24-08-2021 (Dili) — Primeiru-Ministru (PM), Taur Matan Ruak, fó ona instrusaun bá Ministru Defeza, Filomeno Paixão de Jesus no mós Vise-Ministru Interiór, António Armindo atu halo diskusaun, nune’e molok mandatu VIII Governu konstitusionál hotu tenki koloka ona FALINTIL Forsa Defeza Timor-Leste (F-FDTL) iha fronteira.

Xefe Governu hato’o kestaun ne’e, iha ámbitu debate pedidu renovasaun deklarasaun estadu emerjénsia bá dala-17, iha ne’ebé Parlamentu Nasionál (PN), kestiona kona-ba atividade movimentu ilegál iha liña fronterizu.

PM Taur mós preukupa, tanba númeru movimentu liu 100 resin mak hakat liu fronteira ilegalmente, tanba ne’e impossível autoridade seguransa Timor-Leste ho Indonézia lahatene.

“Ha’u konsulta ho suaexelénsia señór Prezidente Repúblika, ha’u fó ona instrusoens bá Vise-Ministru Interiór ho Ministru Defeza par ké halo diskusaun par ké tau forsas armadas iha fronteira, sé la’ós tinan ida-ne’e tinan oin, tanba sé ha’u-nia mandatu hotu ha’u hakarak forsas armadas iha fronteira,” dehan PM Taur iha PN Tersa ohin.

Xefe Governu subliña, pasajen ilegál iha fronteira kuaze 98 to’o 99% mak krime organizadu, tanba ne’e konsege kaptura ona membru polísia balun ne’ebé fasilita movimentu ilegál inklui veteranus balun.

“Iha ita-nia elementus polísia balun ha’u haruka ka’er, veteranus balun ha’u haruka ka’er, ne’e la’ós foin, buat ne’e mai tempu naruk ona, dadauk ne’e ita iha ekipa ida servisu ho provínsia Indonézia par tama uma sai uma ka’er ema,” dehan PM.

Maski nune’e, PM Taur hateten, governu halo kooperasaun di’ak ho Embaixadór Indonézia ne’ebé akreditadu iha Timor-Leste, no mós autoridade servisu hamutuk ho autoridade sira iha provínsia Nusa Tenggara Timur (NTT), nune’e bele lori timoroan sira mai Timór.

Maibé, konkorda atu koloka membru F-FDTL bá fó seguransa iha liña fronterizu, nune’e bele kombate movimentu ilegál iha liña fronteira entre Timor-Leste ho Indonézia.

“Ha’u konkorda ho opiniaun iha ne’e katak, forsas armadas tenki fila-fali bá fronteira, uluk kuandu ha’u sei jenerál tempu Nasoens Unidas nian, sira husu par forsas armadas mak bá, mais ha’u hatete katak, labele, tanba ema sira-ne’ebé agora iha forsas armadas ne’e ema sira-ne’ebé foin funu hotu mai mai, ha’u tauk mak bá provoka malu iha ne’ebá tiru malu, tanba ne’e ha’u husu Nasoens Unidas par tau polísia,” afirma PM Taur.

Maibé, Xefe Ezekutivu ne’e mós rekoñese esforsu husi Unidade Polísia Fronteira (UPF), tanba maske hasoru difikuldade no sakrifísiu oi-oin, maibé konsege asegura fronteira durante tinan 20 ne’e.(ant)