PM Taur Louva ho Progresu Konstrusaun Edifísiu Tribunal Foun

Smnewstl.com (Dili) — Primeiru-Ministru (PM), Taur Matan Ruak garante, projetu konstrusaun edifísiu foun Tribunál Distritál Dili (TDD) iha Kaikoli ho kualidade ne’ebé di’ak.

Prezidente Tribunál Rekursu (PTR), Deolindo dos Santos, konvida Xefe Governu, Taur Matan Ruak, Ministru Justisa, Manuel Cárceres, Ministru Obras Públikas, Salvador Pires no mós ADN, hodi halo inspesaun bá projetu konstrusaun edifísiu foun TDD iha Kaikoli.

Hafoin vizita, Xefe Governu, apresia kompañia kontratór, konsultan no mós traballadór sira-ne’ebé mak servisu bá konstrusaun edifísiu TDD ne’ebé kualidade di’ak tebes.

“Ne’e suaexelénsia Prezidente Tribunál Rekursu mak konvida ha’u señór Ministru Justisa, señór Ministru Obras Públikas ami mak vizita fatin ne’e, iha tinan kotuk ita lansa ohin ami mak vizita. Ha’u hakarak hatete katak, ha’u kontente loos haree kontratór nia servisu no mós konsultan nia servisu kualidade di’ak, tanba ita halo obras barak iha Timór ha’u haree rasik, mais ida-ne’e ha’u apresia,” dehan PM Taur, hafoin remata vizita konstrusaun edifísiu TDD iha Kaikoli, Dili. Sesta (13/08/21).

Xefe Governu afirma, papel tribunál sira-nia iha nasaun estadu direitu demokrátiku ida importante tebes, tanba ne’e presiza kria kondisaun infraestrutura ne’ebé di’ak, nune’e bele hatur lialoos bá sidadaun sira-ne’ebé presiza.

“Ha’u espera ké tinan oin bele remata, tanba hanesan ita-boot sira hatene, estadu direitu demokrátiku ne’e nia pilár boot ida mak setór justisa, justisa tribunais sira ita la tau matan ne’e ita ko’alia estadu direitu demokrátiku mais ne’e ema dehan ita halimar, entaun ita fó fatin infraestrutura ita prepara ita-nia kuádru teknolojia ne’ebé di’ak, par ké sira konfortável servisu hodi konsentra bá iha tau lialoos liu-liu bainhira sidadaun sira buka lialoos,” subliña nia.

Bá PM Taur, la ejize obra sira hotu tuir kontratu, maibé importante mak tenki garante ninia kualidade, tanba obra refere gasta osan estadu nian.

“Bá ha’u, importante liu nia kualidade, ita gasta osan mais depois ita estraga de’it ita la uza tempu naruk ne’e ita dehan, bahasa dehan, buan garam ke laut, so’e masin bá tasi laran, entaun ha’u apresia loos, parabéns suaexelénsia Prezidente ho nia ekipa, ekipa konsultan no kontratór, traballadór sira-ne’ebé halo esforsu par hatudu katak, ita mós bele,” afirma PM Taur.

Xefe Governu mós kongratula Prezidente Tribunál Rekursu, tanba ekipa tékniku sira-ne’ebé halo akompañamentu bá projetu refere di’ak tebes.

PM Taur mós garante katak, kualidade obra husi edifísiu foun TDD ne’e, bele sai referénsia bá infraestrutura sira-ne’ebé sei halo iha futuru, tanba gasta osan povu nian hakarak uza infraestrutura ne’ebé kualidade bá tempu naruk nian.

Entretantu, lansamentu primeira pedra bá projetu konstrusaun edifísiu foun TDD ne’e iha loron 25 fulan Novembru tinan 2020.

Edifísiu foun TDD nian ne’e sei kompleta sala audiénsia julgamentu, sala ba servisu ofisiál justisa, juis, prokuradór, defensór, advogadu no sala de espera ba sidadaun sira ne’ebé atu asesu bá justisa ho espasu ne’ebé dignu.

Projetu refere ho medida andár-rua ho nia valor projetu $10,990,769.35. husi Orsamentu Jerál Estadu (OJE) tinan 2019.

Projetu ne’e ka’er husi kompañia kontratór China Shandong Internasional Economic and technical corporation group husi Xina, no mós superviziona husi konsultór Decrea in Association With AEC, no projetu ne’e sei remata iha loron 6 fulan Marsu 2022.(ant)