PM Taur Lamenta Ho Bispu Baucau Dom Basílio do Nascimento Ne’ebe Mate Derrepente

Smnewstl 30-10-2021 (Dili) – Primeiru-Ministru (PM), Taur Matan Ruak sente sokadu, triste no lamentável ho notísia tristeza kona-ba Bispu Dioseze Baucau, Dom Basílio do Nascimento nia mate derrepente iha sala ICU Ospitál Nasionál Guidu Valadares (HNGV) iha sábadu fim de semana.

Tuir nota pezar ne’ebé smnewstl.com asesu husi gabinete PM katak, Primeiru-Ministru Taur Matan Ruak sente triste no lamenta teb-tebes ho Dom Basílio nia mate derrepente ne’e, maibé buat hotu maromak ne’e nia planu.

“Há’u sente sokadu, triste no lamentável tebes, wainhira rona notisia tristeza kona-ba Amu Bispu Baukau Dom Basílio do Nacimento nia mate ne’ebé derrepente de’it, há’u la espera katak ita nia Amu Bispu bele hasoru situasaun hanesan ne’e, maibé ne’e Maromak nia planu ita hotu la hatene,” haktuir nota pezar PM Taur ne’ebé asesu sabdu ne’e.

Tan ne’e, Xefe Govern ne’e lori nia naran rasik, família no oitavu governu konstitusionál tomak hato’o sentidu kondolénsia profunda bá família enlutada husi matebian Dom Basílio do Nascimento nian, no mós sarani tomak husi Dioseze Baucau, tanba Timor-Leste lakon ona bibi atan di’ak ida ne’ebé durante tinan barak nia laran serví uma kreda liu-liu iha munisípiu Baucau.

“Hodi há’u nia naran rasik, há’u-nia espoza no Governu Timor-Leste nia naran, hakarak hato’o profunda sentidas kondolensias ne’ebé klean ba família hosi Amu Bispu nian em partikular, sarani Dioseze Baukau no Uma Kreda Timor-Leste ba lakon bibi atan diak ne’ebé serbii ona Dioseze Baukau besik tinan 25,” PM Taur dehan tan.

Ho situasaun ida ne’e, Xefe Governo konvida srani sira hotu atu hasa’e orasaun ba Aman Maromak atu simu saudozu iha Nai nia Kadunan Santu no husu atu kontinua tau matan mai povu no nasaun.

Entretantu, Dom Basílio do Nascimento hakotu iis iha Ospitál Nasionál Guidu Valadares (HNGV) iha sala ICE tuku ida meudia ne’e, tanba hetan atakasaun fuan bainhira hala’o hela missaun uma kreda nian iha suai munisípiu Covalima.

Hafoin hetan atakasaun, médiku sira munisípiu covalima, komunika kedas mai iha Dili, no husu apoiu aviaun atu bele transporta lalais amu mai Dili atu halo tratamentu iha HNGV, maibé iha tuku 12 meudia tun iha aeroportu Comoro, no ambulánsia lori bá HNGV, maibé la konsege salva amu bispu nia vida.(*ant)