Peskiza UNDP, Populasaun Barak La Asesu Bá Apoiu Husi Governu

Smnewstl.com 09-11-2021 (Dili) – Tuir segundu relatóriu peskiza ne’ebé United Nation Development Program (UNDP) halo iha Timor-Leste kona-ba impaktu husi sósiu-ekonómiku iha ámbitu Covid-19 iha tinan 2021 hatudu, populasaun barak mak la konsege asesu bá apoiu husi governu nian.

Tersa-feira ne’e, Primeiru-Ministru (PM), Taur Matan Ruak, ho membru governu, hamutuk ho parseiru dezenvolvimentu UNDP iha Timor-Leste, halo lansamentu 2° relatóriu peskiza husi impaktu Sósiu-ekonómiku kona-ba Covid-19 iha Timor-Leste.

Koordenadór Rezidente Nasoens Unidas iha Timor-Leste, Roy Trivedy hateten, estudu refere nu’udar estudu fahuluk ne’ebé haree liu bá impaktu husi Covid-19 bá ema hotu iha Timor-Leste, nune’e bele buka hatene kona-ba efeitu husi pandemia ne’e bá empreza liu-liu mákro no mikro.

Maibé Roy Trivedy afirma, rezultadu peskiza refere mós demonstra katak, iha uma-ka’in 80% mak sente kontenti ho apoiu husi governu, liu husi programa cesta bázika no apoiu sósiu-ekonómiku seluk tan.

“Rezultadu ne’e mós hatudu katak, 80% husi ema ne’ebé mak simu apoiu ne’e sira sente kontenti, maibé hatudu mós katak, ema barak mak la konsege iha asesu bá iha apoiu sira, ne’eduni estudu ne’e buka tuir atu hatene mós sira-nia situasaun no liu-liu ema sira-ne’ebé iha situasaun vulnerável, sira-nia esperiénsia durante pandemia ne’e oinsá,” dehan Koordenadór Rezidente, Roy Trivedy, hafoin remata lansamentu segundu relatóriu iha Otél Timor, Dili, Tersa ne’e.

Rezultadu husi estudu ne’e mós halo intervista bá ema liu rihun 20 atu buka hatene kona-ba sira-nia esperiénsia ne’ebé sira hasoru durante pandemia Covid-19 ne’e, no mós intervensaun governu nian atu responde bá nesessidade no difikuldade ne’ebé populasaun sira enfrenta.

“Valór adisionál boot ida husi estudu ida-ne’e maka, primeiru tanba ne’e mak estudu ida primeiru liu ne’ebé halo iha área ida-ne’e, intrevista ema liu rihun 20-resin hodi hatene saida mak sira-nia susar no nesessidade iha tempu ida-ne’e, no oinsá governu parseiru dezenvolvimentu sira no ajénsia sira seluk bele halo hodi ajuda sira liután,” tenik nia.

Tan ne’e, nia afirma, dokumentu refere sei kanaliza bá governu, atu sai hanesan buka’e bá governu, nune’e bele kria polítika ne’ebé di’ak atu bele rezolve problema refere.

Sorin seluk, Reprezentante Rezidente UNDP iha Timor-Leste, Munkhtuya Altangerel reforsa, estudu refere mós liga bá situasaun juventide nian hahú husi tinan 25 to’o 29 ne’ebé barak mak lakon servisu, tanba kauza husi pandemia Covid-119.

“Estudu ida-ne’e mós liu-liu kona-ba juventude sira husi tinan 25 to’o 29 barak mak lakon sira-nia servisu, ne’eduni estudu ne’e rekomendasaun importante maka atu haree oinsá bele haree bá sira-nia situasaun, tanba, bainhira sira servisu, iha mós impaktu bá ita-nia ekonomia no sosiedade,” dehan Munkhtuya Altangerel.

Alem ne’e, estudu refere mós haree bá uma-ka’in vulnerável sira, liu-liu bá ema ho difisiente, labarik, ferik no katuas.

Ne’eduni, liu husi estudi refere, atu rekomenda bá governu atu bele kria polítika protesaun sosiál ne’ebé di’ak, atu bele tau matan no fó asisténsia bá sira.(ant)