Difisiensia Matan ETBU Becora Hetan Tulun Aihan Hosi Xanana

SMNEWSTL MEDIA.Responsabel Sekretariadu Apoiu Solidaridae Maun Boot, Kay Rala Xanana Gusmão, Thomas do Rosário Cabral no Deonisio Babo Soares entrega apoiu aihan ba membru difisensia matan East Timor Blind Union (ETBU) Suku Bekora, Postu Administrativu Kristu Rei, Munisipiu Dili. FOTO: Espesiál

DILI:  Lider Istóriku Kay Rala Xanana Gusmão ho Timoroan hosi Inglaterra, Sidade Peterborough no Thrapston kontinua organiza Timoroan sira iha nasaun estranejersu kontinua fó apoiu aihan ba ema ho difisensia matan hosi Organizasaun East Timor Blind Union (ETBU) Suku Bekora, Postu Administrativu Kristu Rei, Munisipiu Dili.

Apoiu aihan hanesan foos saka 5, supermie kaixa 5, mina bimoli kaixa 1, Rinso Daia kaixa 2, Manutolun rack 5, ikan sardina kaixa 1, no sasán sira seluk tan hanesan, manta 5 pcs, kulusaun 5 pcs, sumasu 5 pcs.

Apoiu ne’e  entrega direita hosi Responsabel Sekretariadu Apoiu Solidaridae Maun Boot, Kay Rala Xanana Gusmão, Thomas do Rosário Cabral no Deonisio Babo Soares ba Diretór ETBU, Jacinto Pereira ho membru sira iha edifisiu ETB Becora-Dili, tersa (19/05).

 Aihan hirak ne’e apoia hosi Xanana hamutuk ho Timoroan sira ne’ebé hela iha hodi tulun membru ETBU na’in-34 kompostu feto 8, mane 26 sai vitima ba inudunasaun no presizxa tebes tulun, tanba dezastre ne’ebé akontese iha loron 4 Abril 2021 afeta mós membru difisensia matan sira nia moris.

Diretór ETBU, Jacinto Pereira hato’o agradese ba apoiu hosi Xanana Gusmão ne’ebé kontinua tulun membru ETBU sira inklui komunidade afetadu inundasaun iha Dili no munisipiu sira.

“Ami agradese tebes ba apoiu hosi Maun Boot Xanana, ami mós akompaña hela maun boot nia atividade halo asaun karitativa iha Dili no munisipiu sira, mezmu maun boot la partisipa, maibé ami hato’o nafatin ami nia agradesimentu ho orasaun ba Na’I Maromak atu tulun,” Jacinto agradese.

Nia dehan, durante inundasaun membru balun nia uma mós bee no mota estraga hodi afeita mós ba sira ho familia nia moris.

Responsabel Sekretariadu Apoiu Solidaridade Maun Boot, Kay Rala Xanana Gusmão, Thomas do Rosário Cabral dehan, tuur loloos Maun Xanana maka atu entrega, maibé tanba fokus hela servisu apoia vitima inundasaun iha Tasi Tolu Dili, tanba ne’e labele partisipa.

“Maun boot haruka ami lori hela asistensia aihan ne’e mai, nia hatene hela imi nia kondisaun, tanba mai vizita imi nia fatin ne’e, tanba ohin Maun Boot Xanana hala’o hela servisu iha Tasi Tolu hodi tulun mós ita nia maluk sira ne’ebé sai vitima ba uma bee tama,” dehan Thomas liu hosi deskursu.

Dadaun ne’e Xanana kontinua orienta ekipa hodi hala’o nafatin apoiu solidaridade ba vitima inundasaun iha Dili no munisipiu sira. (**)